لوّ ان عندي مثل ما عند الوليـد بـن طـلال


شريت برج الفيصليه لجـل اغيـظ المملكـه



ماهو على شان الجنيه ولا على شان الريـال


لكن على بالي طرى شـيٍ تمنيـت ادركـه



غروٍ غريرٍ غرّره زينـه ومطغيـه الـدلال


لا شاف له شيٍ يبيه ف ظرف لحظه يملكـه



اللي سواته وبسهوله يملـك قلـوب الرجـال


اليا لمح له درب في قلـب الرياجيـل سلكـه



هذا وانا ما شفت منه الا التمنّـع بالوصـال


كفي من الحسرات لا منـي تذكـرت افركـه



يحبني وادري بحبه مير مـا جالـي مجـال


أجلس معه جلسه وهذا الوقت ما فيـه بركـه



يطري علي مع السهر واخذ ثلاث / اربع ليال


تقول كن العين ظبي وحضرة الليـل شركـه



صوته ليا جاني ظما يسقيني المـيّ الـزلال


وساعة غيابه تدخل عيوني ونومـي معركـه



شفايفه جمرٍ وانا شاعـر سريـع الاشتعـال


الله شغلني به وغيري ما شغلـه الا كبكـه !!



لبّا عيونه والشعر لا حط شال وشـال شـال


إن طوّله وان قصرّه وان سعوّده وان أمركـه



ولبّا النحيل اللي تحمّل شيلـة حمـولٍ ثقـال


ولبّا الثقال اللي ولو وقّف يجي فيـه حركـه



إليا قفل جواله اظلم كـل مـا حولـي ومـال


فكري لتيار العذاب وكـل طـاروق مسكـه



واصبحت اهوجس ما تقول الا الوليد بن طلال


مع اني افقر شخص عايش في حدود المملكه