على الله يابداية خاطـري يـا عاصمـة دنيـاي


على الله يالحـروف التايهه فـي نظـرة التايـه


على الله يالطريق اللي معاريفك تعـب رجـلاي


على الله يا مسافر فـي طريـق مالـه نهايـه


الا يالليل لا تسري ولا تشـره علـى مسـراي


دخيلك لا تقـدم شرهتـك مـن دون مسرايـه


على شان الحبيب اللي يسابق نظرتـي وخطـاي


على نفس الطريق اللي من اجله تعبـت خطايـه


ترجيتك تساعدني وانـا منـدم علـى رجـواي


اذا شفتـك تـوادع ضيقتـي وتعانـق رضايـه


وانا اخترتك رفيق الدرب في صمت السنين الجاي


ولا اخترتك لين اصبحـت لـي اعـز اخويايـه


وانا ماعشت وقتي يا زمانـي بيـن راي وراي


انا عشته على عـز ورضيـت بحكـم مولايـه


ولااطرد من سراب الوقت مايخفي علـي منـاي


اعيش الواقع الحاضـر لعيـن ايامـي الجايـه


مدام ان البحر ملك وهمسـات النسيـم اسـراي


عليـه مـن حزامـي ماتفـك ايدينـي الرايـه


كذا ولا كذا خاتـم مـلاك الفكـر فـي يمنـاي


يطيب بقربها قلـب الصديـق وتجـرح عدايـه


وانا فاللـي ورثتـه ورث لا بايـع ولاشـراي


ومثلي فالوصايه مايبـي لـه هـرج ووصايـه