كلّ ممكن زهدته في رجا المستحيل


قلت آباطول نجمة ما حدٍ طالها



يقنع القلّ من عزمه بروحه قليل


الحرار إتضايق من ردى حالها



لا تململ ترا بال المفارٍق طويل


والليالي عجافٍ يا وسع بالها



علّمتني على طول المدى والرحيل


أضحك إنّ شالت الأحزان موّالها



حسبي الله على وقتي ونعم الوكيل


ظلّ يستدرج الأحلام وأغتالها



مابقى تمر لو هزيّت عذق النخيل


إقطفتها السنين وماتت آمالها



ملّت العيس حاديها يحطّ و يشيل


ودّها تستريح وترمي أثقالها



وجد حالي وأنا حالي بليّا نحيل


وجد من محتمي له كلمةٍ قالها



يومّ دنّ الشمال وهبّت الريح هيل


لين روحي بغت تقضي على جالها



إيييه ياللي مثل قلب الزمان البخيل


جادك الدمع وعيوني وغربالها



غصنك اللي مع أنفاس الحكاوي يميل


ماترك عدله إلاّ ميّل أحمالها



شاعرك مؤمن إنّ الوصل ماله سبيل


لكنّ الروح ماهو راضي إذلالها



كان في حاله وفاله وطبعه ثقيل


لكن الناس تكذب ماهي بفالها



كان ممكن أكون وكنت مالي مثيل


تشبه الناس بعض وواجد أمثالها



لو لصوتي مع العالم شبيه وبديل


كان خلّيت الأنفس تلبس أسمالها