حكاية ملايكه وقصة ميدان


وعِشق وتحدي وعزيمه وإيمان


حكاية اللي صمم وقال استحاله


حكاية اللي كمل طريق الرساله


حكاية اللي صدق فريق الضلاله


حكاية اللي باع القضيه وخان


000


ميداني ومكاني وقلبي نزف


ملايكه وجولك ينالوا الشرف


وقادوا شموعك وطلقوا البخور


وفتحوا لبُكره 00 طاقه ونور


ورسموا الطريق وبنولك جسور


وقالوا عداله وعيش وأمان


00


// نزلوا الملايكه ع الميدان بالعرض


بعد اما إتوضوا وصلوا الفرض


قالوا دمانا ان شالله تروي الأرض


تزرع سنابل شمس بُكره غيطان


نزلوا الملايكه ع الميدان بالطول


شافوا الحقيقه كله بات مذهول


هربوا الملايكه م الميدان على طول


وازاي ملايكه هتآمن لشيطان //


000


حكاية ملايكه وقصة بلد


وفرحه بحلمنا لما اتولد


قلبت بآهه ودمعة وداع


بتلعن يوماتي ف كل اللي باع


و تنده بقوه أملنا اللي ضاع


وتحكي الحكايه وكان ياما كان


حكاية ملايكه وقصة ميدان