الشتا دخل البيوت


أكل اللحاف والدنيا برد


والفقر عشش ع الحيطان


والعيشه سد


الكل راكع ف الطابور


ولاحد راضي يمد إيده لحد


..



رغيف العيش قدم إلتماس


إشمعني عِز كل يوم


بيعلي في سعر الحديد


الطاق طاقين


ومافيش حساب


علشان كده


جاله إكتئاب وكش خالص


وصبح يادوبك لقمتين


.......


الحياه صبحت جحيم


وآدي ألف سين


مش لاقيه جيم


والحل أصبح معتقل بقانون غريب


ورجال حبيب مسكوا البلد


أستغفر الله العظيم


أستغفر الله العظيم


........


إتبرعوا يااهل الإيمان


إعلان


علي كل الكنايس والجوامع


في الميدان


هات م الآخر


طب إزاي أنا أصبح مؤمن


والجوع كافر ؟؟!!!


...............



العجوز قال لايجوز


الشعر الابيض يوم يبان


طب والسنان ؟


البلع سهل


والطقم لازم يبقي حل


.......................



من ييجي كام مليون سنه


معصوره عصر


من ييجي كام مليون سنه


محصوره حصر


وعشان تفوق


طب ييجي كام مليون سنه


عاوزاها مصر ؟؟؟


................



البلد مسجونه جوه نفسها


رافضه تفارق أمسها


طب مين ياناس هايحسها ؟!


وحارسها خوفها ويأسها


......



مصر ...المنيا .. يناير 2006