خليك فاكر وماتنساش


طول مالدم المصري بلاش


يسقط أي رئيس موجود


واللي حتى لسه ماجاش


0000


يسقط أي رئيس مش سامع


يسقط أي رئيس مش شايف


والمسؤول اللي يكون تابع


لأوامر أسياده وخايف


يسقط يسقط ومايعلاش


وخليك فاكر وماتنساش


000


يسقط أي رئيس بيساهم


ف بنا حواجز أو متاريس


يسقط أي رئيس مش فاهم


انه لكل الشعب رئيس


وانه لولا الشعب ماجاش


وخليك فاكر وماتنساش


000


يسقط أي رئيس مش عارف


طلبات شعبه ونازل كذب


يسقط أي رئيس كان شايف


إنه بس رئيس للحزب


وياإما حزبه ياإما بلاش


وخليك فاكر وماتنساش


000000


يسقط أي رئيس يتغابى


على ذكاء المصريين


ينسى هموم الناس ف امبابه


ويفكر في هموم الصين


وايه الأولى وماأولاش


وخليك فاكر وماتنساش


0000


يسقط أي رئيس مش حاسس


شعبه إمتى عطش أو جاع


يسقط أي رئيس كان لابس


كل يوم على وشه قناع


يسقط أي رئيس خُفاش


وخليك فاكر وماتنساش


0000


يسقط أي رئيس لو حتى


كان الشعب كله اختاره


يسقط لو مامشيش ع الخطه


يسقط لو غير في مساره


يسقط أي رئيس غشاش


وخليك فاكر وماتنساش


0000


وأخيرا


تسقط كل حلول أمنيه


يسقط كل نظامكوا القمعي


يسقط غازكوا المالي عينيه


هااغسل آهة مصر بدمعي


واهتف عاش المصري عاش


وخليك فاكر وماتنساش


طول مالدم المصري بلاش


يسقط أي رئيس موجود


واللي حتى لسه ماجاش


5 مارس 2013


00000000