هو سؤال ومنتظر رده


عاوز جواب


عن بُكره .. عن بعده


واخدانا لفين ؟؟


والسكه مش واضحه


وف مفرقين


ياخطوه فين رايحه ؟


في طريق.. نكون متجمعين صحبه


نعبر سوا أيامنا لو صعبه


ياطريق ياخدنا لسِكه منسيه


وكل واحد يمشي فيه لوحده


يا سكة الحزن يامرخيه


ناصبه شباكك


ومجهزه الخيه


والعتمه جايه بنفس مكسوره


خايفه تبان والشمس في الصوره


مهما تخبي ياعتمه خفافيشك


مهما تقومي وتنفشي ف ريشك


خطاويكي وسط اللمه محصوره


لاكان في يوم ملحنا ملحك


ولاعيشنا كان في يوم عيشك


يامصر قولي سكتك مع مين


يامصر جاوبي وطمني العاشقين


انتي مع اللي بيعشقوا ترابك


دايبين صبابه ويمدحوا عتابك


أول حروف يقروها في كتابك


واول خطاويهم يفتحوا لبابك


وفي سكتك راح يفضلوا ماشيين


ولا مع اللي جم مع الهوجه


وفي كل ريح بيركبوا الموجه


حسب اتجاهها بينصبوا شراعهم


وحسب هواها بيفردوا دراعهم


بيعوجوا العدله ...... وبيعدلوا العوجه


هو سؤال ومنتظر رده


عاوز جواب عن بُكره عن بعده


يرشد طريقي وليكي يهديني


إخترتي مين ؟؟ يامصر جاوبيني