شعراء العصر الحديث

قصيدة قومي ياأجدع بلد الشاعر أشرف فايز

قومي ياأجدع بلد …. ماتشمتيش جاني

دا الحب فيكي اتولد … وهديه مجاني

ولا مره قلبك عرف …. للفرقه أي طريق

حُبك دا كان السند .. في الشده نجاني

……………………………

قومي ياأجدع بلد ….. إياكي والمِحنه

وماتخافيش م الليل خفافيشه تجرحنا

احنا سند ضهرك واحنا كمان مهرك

واللي سبب قهرك مالوش مكان ريحنا

………………………………….

قومي بلاش الدلع … قد حان وقت القوم

كرهنا طعم الوجع … ولقد سئمنا النوم

قومي بقى وامضي .. ف طريقك الوردي

ورجعي مجدي …. وماأحلى ذاك اليوم

………………………………….

قومي ياأجدع بلد …….. قومي و ماتستنيش

اللحظه تفرق مابين . .. يانموت ياإما نعيش

ياللا اعدلي ميلك ….. واتوضي من نيلك

الفجر هايجيلك …… ويطرد الخفافيش

………………………………..

قومي ياأجدع بلد …. لو سيبتينا نعاني

تحريرنا واقف هناك … مشتاق لأحضاني

إستقوي بشبابك …. دول بس أحبابك

واللي فتح بابك …. مايقفلوش تاني

……………………………..

قومي ياأجدع بلد …. ماتشمتيش الاعداء

قدم حياته الولد …. بكل حب فداء

واقف يناديكي ….. ماتفتحي عينيكي

وشيلي بإيديكي …. من كان سبب للداء

………………………………….

قومي ياأجدع بلد ……….. دا كلنا سامعين

نادي وقولي المدد …. تلاقيه ف غمضة عين

جاهزين ف كل مكان ….. م القاهره لأسوان

وف قلب كل ميدان ….. تلاقينا بالملايين

……………………………

قومي ياأجدع بلد ….. ياحُره ياأصيله

قومي ولمي الولاد …. وجمعي العيله

دا الكل أحبابك ….. واقف على بابك

شايل لأحمالك ….. لو تقلت الشيله

……………

قومي ياأجدع بلد ….. دا الكل محتاجك

ندفع حياتنا تمن …. وتحرري تاجك

ياقبلة العاشقين ….. مينا وجنبه أمين

دا حبهم الاتنين …. مافيش غيره علاجك

………..

قومي ياأجدع بلد …. الليله ليلة العيد

وجمعي العاشقين …. قريبين وبعيد

افتحي أحضانك … تخضر أغصانك

وتعودي لزمانك … وتحققي المواعيد

………………………..

التعليقات

اظهر المزيد
زر الذهاب إلى الأعلى

أنت تستخدم إضافة Adblock

برجاء دعمنا عن طريق تعطيل إضافة Adblock