"أنا باوَحِّد اللي خلق الناس


خلق مسلمين ونصارى


وناس نامت على فَرش وِكْناس


وناس ع المعايش حيارى


***


إوعى تقول للندل يا عم


وان كان على السرج راكب


ولا حد خالى من الهم


حتى قلوع المراكب


***


أنا لم لقيت لي سعد ولابخت


ولا خِل صادق ..قناني


جيت عند بيت عزولي اتلبخت


عبوا لي الدوا في قناني


***


إذا راعيت ارعى النوار


والمرتعى لا ترعى فيه


واذا ركبت اركب مهار


واللي على إيدك تربيه


***


إن سرحتْ الناس روحت


وإن روحوا كنت سارح


وإن فرحت الناس نوحت


وإن نوحوا كنت فارح


***


إن صادفك سعد الأيام


وأنت على النحس ديمه


اضرب عصاك لقدام


عوجه تجي مستقيمه


***


اترك من الناس من كان


في باطنه لك سوادي


صده وخليك منصان


عنه ولو كان يعادي


***


جاني طبيبي مع العصر


وف إيده ماسك عصاية


اتاري طبيبي قليل أصل


من خصمي جابلي الوصاية


***


جاني جواب من البلد


وسلام حبيبي فيه


مكتوب بحرف الألم


والدمع باين فيه


***


حلو النبي وحلو رقابيه


ياما هوَّه بدر البدورة


من يوم جبرائيل رقى بيه


من سابع سما فج نوره


***


حرامى وعاصى وكداب


عاجز هزيل المطايا


وتبت ورجعت للباب


هيا جزيل العطايا


***


خشب المراكب من السنط


في البحر ياخد مهاجه


واجل ع الحر يلزم الصمت


لما الهلف باخد مهاجه


***


خلخال خطر ع القدم


كل المحاسن فيه


والصايغ اسمه حسن


صانع جميع مافيه


***


دخلت بستان حبيبي


أتفرج علي اللي فيه


لاقيت عريض الفلا


فارش ونايم فيه


***


دايما على الحمل صبار


اللي أصوله زكيه


ويخشى من اللوم والعار


و من انكشاف الطويه


***


زمنا زمن الكلوبات


لمط الصفيح بطلوها


ياما ناس ما لهاش ابات


صبحت تحلف بابوها


***


سكت الهَوى والناموس طار


والسبع طاطا بعينه


خليه دا النومِ أستار


لما الكللب ياخد يومينه


***


سحبت سيف المحبه


لجل ما أرميه


رمش بعينه رماني


قبل انا ما أرميه


***


شوف الزمان انتهت عَدَليه


وادي البُطْل ع الحق راكِب


جه السبع يُطلُب عدليه


لَقَي الهِلف ع التخت راكب


***


صابونة العدو ما ترغيش


وان رغت ياللا السلامه


إن قعدت فى مطرح ما ترغيش


حتى تقوم بالسلامه


***


صلاة النبي بتزيدني شوق


وتمنع البلا والمراضي


قال له الإله: اندفن فوق


قال: أمِّتي في الأراضي


***


صلاة النبي تغني عن القوت


وتمنع البلا والمراضي


يستاهل علقته بالسوط


اللى معاه كفو الزيارة ما راضي


***


طبيب الجرايح قوم اِلحق


وهات لي الدوا اللي يوافق


فيه ناس كتير بتعرف الحق


ولاجل الضرورة توافق


***


غربي بلدنا بلد سيح


وادي الهِلف ماشي ورانا


مش عيب كراسي التماسيح


تقعد عليها ""الوِرانا""؟*


***


فيهم كما همة البين


والبعل مسكين قناها


وفيهم الدابة والتنين


ورطه على اللى اشتراها


***


فَرَطت قِلعِي ما جانيش ريح


وعاودت ع البَر ناوي


ياما ناس زيِّنا مجاريح


* لكين صابرة ع البلاوي


***


فى البحر لم فتكم


فى البر فتونى


وبالتبر لم بعتكم


بالتبن بعتونى


انا كنت وردة البستان


انتوا لية قطفتونى


***


قلل كلامك وخليك


فى كل محفل موقر


وأحسن لمن كان يؤذيك


بالسوء فى كل محضر


***


كل عيشك بملحك وفجلك


وعيش عيشة جدودك


واتمد على قد رجلك


بلا تزيد عن حدودك


***


كسرة من الزاد تكفيك


وتبقى نفسك عفيفه


والقبر بكره يطويك


وتنام فى جار الخليفه


***


كيد النسا يشبه الكى


من مكرهم عدت هارب


يتحزمو بالحنش حى


ويتعصبو بالعقارب


***


كلام الغَرَأبا حِمِلناه


فات علينا كما ريح هاوي


كلام القرابا إخ منَّاه


وياجي فوق فرش الكلاوي


***


كل عيشك بملحك وفجلك


وعيش عيشة جدودك


واتمد على قد رجلك


بلا تزيد عن حدودك


***


كيف العمل في رفاقة


الود فيهم نميمة


والقرب منهم حماقة


والبعد عنهم غنيمة


***


لا أنام على الشوك عريان


واصبر على ما جرالى


واصبر عليك يا زمان


حتى ينعدل حالى


***


لولا النبي لا كون ولا نار


ولا أَسلام صلت وصامت


ولا كان فيه ليل ولا نهار


ولا جْمال في الجو هامت


***


لا تسلك الطرق وحدك


بحر المحبة غوارق


وامشي مع اللي يودك


واترك هوى اللي يفارق


***


من يبغضك لم يحبك


ولو طعمتو الحلاوه


السن للسن ضاحك


والقلب كله عداوه


***


ماله الهوى زاد وَسْمِى


من حين بعادهم بدا لى


سمت ولدها على اسمى


خايف تحبه بدالى


***


ما ينجدك غير دمك


ولا ينفعك غير مالك


واحلف يمين بعد أمك


حبيب من النسا ما بقالك


***


ماأشقاك ياشاهد الزور


في الحشر حالك يحزّن


ذنبك لدي الناس مشهور


في يوم يبان المخزّن


***


مسكين من يطبخ الفاس


ويريد مرق من حديده


مسكين من يعاشر الناس


ويريد من لا يريده


***


ما يرقد الليل مغبون


ولا يقرب النار دافي


ولا يطعمك شهد مكنون


إلا الصديق الوافي.


***


ما حد سالم من الهم


ولا الحصى في الأراضي


لا له مصارين ولا دم


ولا هو من الهم فاضي


***


من حبنا حبناه


وصار متاعنا متاعه


و من كرهنا كرهناه


ويحرم علينا اجتماعه


***


نصحتك ما اتنصحت


والطبع فيك غالب


وديل الكلب لم يتعدل


لو حطوا فيه قالب


***


ولا حد خالى من الهم


حتى قلوع المراكب


ماتقولشى للندل عم


وإن كان على السرج راكب


***


والله ما هى بسعيك


ولا بكتر الخطاوى


إلا إذا كان سعدك


فى كل خطوة مساوى


***


ولابد من يوم معلوم


ترتد فيه المظالم


أبيض على كل مظلوم


واسود على كل ظالم


***


ومبين الدق لاخضر


قلت له غطيه


قال لا انت ابن عمي


ولا ابن خالي ولا شريكي فيه


***


سحبت سيف المحبه


لجل ما أرميه


رمش بعينه رماني


قبل انا ما أرميه


***


يا قلبي إوعى تعاشر الدُون


ولا تكلِّمُه بالاشتراحة


تكلمه الكلامِ موزون


تلقاه يرد بقباحة


***


يا بت جملك هبشني


والهبشة جت في العبايا


رمان صدرك دوشني


وخلى فطوري عشايا


***


يا قلب لاكويك عاشق بالنار


وان كنت عاشق لازيدك


يا قلب حملتني العار


وتريد من لا يريدك


***


يا بت كل البنته


عملوا دموعهم مخادد


صابهم من الحزن حته


وانتى اللى جواكى مادد


***


الندل له طعم مالح


وله خصايل ذميمه


القرب منه فضايح


والبعد عنه غنيمه


***


الناس للكف باسطين


والكل عاوز نوالك


واللى خضع لك وباس طين


للشر هوه نوي لك


***


الليل ما هو قصير


إلا على اللى ينامه


والشخص مادام فقير


ما حد يسمع كلامه


***


الجاه.. لو كنت خايف من الله


ولا من القبر والهول


ما كنت تغتر بالجاه


والظلم والجوز والصول


***


الجود ماهواش بمال


ولا بلبس القماشي


دا طبع في الشخص سلسال


لاهو بماله ولاشي


***


الندل ميت وهو حي


ما حد حاسب حسابه


وهو كالترمس الني


حضوره يشبه غيابه


***


الحر يصبر على الضيق


ولا بيفرح لعادي


لو ينشف الفم والريق


يتم ع الحال هادي


***


اللى يداديك داديه


واجعل عيالك عبيده


واللى يعاديك عاديه


روحك ماهياش فى إيده


***


اللي حبنا حبناه


وصار ماتعنا متاعه


واللي كرهنا كرهناه


ويحرم علينا اجتماعه


***


اللى على الخير هنيه


وبشره بالغنيمة


واللى على الشر عزيه


بكره يلاقى الهزيمه


***


اللي يوفيك وافيه


واجعل عبيدك عبيده


واللي يخليك خليه


لو كان روحك بإيده"