"بسم الله الرحمن ابدا كلامي وعلى النبي المصطفى خير تسليم


وعلى الوجوه المسفهلة سلامي وعلى الديار اللي لها كل تحشيم


وبعد اني من عظيم احترامي لحضوركم ماقلت حكيٍ وتقديم


يا رافعين الضيف قدر متسامي ياللي غمرتوني مشاعر وتكريم


من جيت .. والترحيب خلفي وامامي العين مرتاحة وفي السمع ترنيم


شعري بدابي من شديد اهتمامي اني اوفي قدر طيبٍ مثل ديم


يسقى ولاه وتاركٍ نبت ضامي عطشى رووبه وامتلتبه مرازيم


حييتي يا أرض الوفى والوئامي ديرة عظيمة .. زادك الشيخ تعظيم


جابر وله في المجد مجد مترامي هو صاحب الطولات غيث المظاليم


وسعد الكريم الشهم عالي المقامي اخوان مريم مجدهم ياصل الغيم


ياكويت ماننسى الوفى في الكرامي يوم البلاد اشتات وارضي اقاليم


منك انطلق عبدالعزيز الامامي رد الرياض وعمم الخير تعميم


ياسعد من كانوا عمامه عمامي حماة للاسلام شرع وتعاليم


وياسعد من كان الفهد عنه حامي يبشر بفك الكرب وبرفعة الضيم


تشهد له الاحداث ماهو كلامي قال الاخو والجار في قلبي iiمقيم


قال الكويت ارضي حربي سلامي مانيب حاسبها ولا احتاج تقييم


قدم بلادها قال مالي مرامي كود الحقوق تعود من غير تقسيم


فهد اللي حرر لاتفكر في اسامي رد الكويت وحطم الشر تحطيم


وعاد الصباح وزال كل الظلامي والنور حجم سود الافعال تحجيم


يالله يامحيي رميم العظامي يامنزل ""طه"" و ""فاطر"" و ""حم""


نسألك تبري جرح في القلب دامي واترد اسرانا لنا في الخواتيم


امين يارحمن هذا ختامي وعلى النبي المصطفى خير تسليم"