إبكي كمان ياراحيل


نوحي وزيدي عويل


غربة ليلك أهي محاصراكي


آهة ويلك ماشيه معاكي


دم ولادك غرق دجله


وفاض على نهر النيل


وابكي كمان ياراحيل


.......



إبكي كمان وكمان


واتغطي .. بالاحزان


ابنك طالع يوم العيد


راجع ليكي وهو شهيد


أو ...


زي ماقالوا قتيل


وابكي كمان ياراحيل


........



إبكي على الأحباب


والوطن الكداب


اللي لف بيكي ودار


واللي راميكي ف وسط النار


واللي ساقيكي الويل


وابكي كمان ياراحيل


.......



إبكي على الغاليين


واسألي راحوم فين ؟


آه ياولادي ويانار حزني


وإمتى هاخدكم تاني ف حضني


ولا فراقكوا طويل


وابكي كمان ياراحيل


......



إبكى بإستمرار


إبكي في ليل ونهار


م اللي باعك واللي خانك


واللي بيشكك في إيمانك


بغدر ماله مثيل


وابكي كمان ياراحيل


......


ياراحيل لمي الدم بإيدك


ياراحيل اطفي شمعة عيدك


ياراحيل إبكي وكالمعتاد


لفي الدار بسواد في سواد


حزنك حزن تقيل


وابكي كمان ياراحيل


.......


ياراحيل لسه باقي دموع ؟


ونبض في قلبك الموجوع ؟


ظلم الشر مهما ان صابك


عمره مايقدر يقفل بابك


وخدي الماضي دليل


وماتبكيش ياراحيل