يا ياسين شايفه خلقاتك


متعاصه بدم وطين


الطين من عرق الشارع


والدم دا جاي منين ؟؟


يا ياسين إحكي وخبرني


كلمايه ياخوي صبرني


لو صبرك هايمررني


هازرع صبرك بساتين


يا ياسين


.............


يا ياسين وادي غيبتك طالت


وانا منتظراك يا ياسين


حكاويك ياوليدي اتقالت


مش عارفه أصدق مين


والدم بينزف لسه


تاهت في القصه القصه


والناس م الآخر حاسسه


ولا ماعدوش حاسسين


يا ياسين


............


يا ياسين وف وسط العتمه


كان صوتك فجر نهار


صرخه وكانت منكتمه


الصمت ساعتها انهار


خبرني راح فين صوتك


خبرني سر سكوتك


دفنوا سِرك مع موتك


فاكرين اننا ناسيين


يا ياسين


.............


السهم الغادر صابك


واصحابك كانوا حواليك


طب مين بس من اصحابك


سبل ياضنايا عينيك


ولا سابوك وحدك تنزف


في الشارع جرحك يعزف


ولا مالحقتش تعرف


الرُحما من القاسيين


يا ياسين


............


يا ياسين واخترت بهيه


وعليها راهنت بعمرك


ورفضت لبيت وماهيه


قلت ان بهيه دي قدرك


ولا كل كنوز الكون


هاتخلى شرفي يهون


وهاكون مطرح ماتكون


دي بهيه الروح والعين


يا ياسين


........


يا ياسين طب قوم ماتنامشي


دي بهيه إليك محتاجه


وباقول دا لحافك رمشي


واحميني ياخوي م الحاجه


دانا وحدي ف وش المدفع


والكل في لحمي بيقطع


من غيرك بس هايدفع


عني ظلم الظالمين


يا ياسين


...........


يا ياسين والسكه طويله


ماقدرشي امشيها وحديا


وانا وحدي قليلة الحيله


محتاجه إيدك في إيديا


مشتاقه قوي لأحضانك


إفتح قلبك وبيبانك


وصلني لشط أمانك


كان شطك بر أمين


يا ياسين