هاتوا الدوايه واكتبوا ياهل القلم


إزاي ضميرنا ف لحظه يصبح في العدم


مات الضمير


ومت انا


لما صحى فىّ الألم


والصرخه شقت حاجز الصمت الرهيب


العدل ظالم ؟!!


ولا هو اللي انظلم ؟


ياكل من نادي بصوت الحق


قولها ع الملأ


ميت ألف لأ


لأ للدمار


للإنهيار


لأااا ومليون ألف لأ



انك يا صوت الحق تهرب م الميدان


وانك يا صوت الحق تكدب كالجبان


انك يا صوت الحق ترفض


مره تغضب او تثور


تصرخ تقولها ألف لأ



لما ميزانك يتعوج


والمعبد اللي كُلنا اتعبدنا فيه


شايفاه عيوننا بيتهدم



من بين زئير الدبابات


شايف عيونك ياصبي


تنده علي قلب الزمان


ياعمي إلحق والنبي


دمي اللي سايح ع الطريق


وملا المكان


لِمه بإيديك الطيبين


خليني اغمض عيني وأرقد في أمان


ليه ياشجاعتي بتهربي


آه من شلل صاب اللسان


آه ياجبان


مش هو ده نفس المكان


اللي حضن يوم خطوتك


مش هو ده نفس الصبي اللي قابلته في سكتك


طب خُفت ليه


تجري عليه


تاخده في حضنك


زى ما أخدك أبوه فى الحضن دوا من زمان



آآآآآآآآآآآآآآآآه


آه يازمان الشوم يازمن العبيد


آه يازمان قلبك حجر


ملعون مخادع يازمن قاسي وعنيد


لا بترحم القلب العجوز


ولا ترحم القلب الوليد


مين الشهيد ؟


قلبي اللي مات من جُبنه ؟


ولا دا الصبي الواقف وحيد ؟


من بين زئير الدبابات


شايف عيونك ياصبي


تنده علي قلبي اللي مات


ياعمي حقق مطلبي


واصنع بدمي حِنه يوم عُرس البنات


أو


إروي نخله هدها طول العطش


علي شط نيلك


أو علي شط الفرات