عيونك شمس


لسه بتلملم في حروفها


خجلانه ودايبه في كسوفها


وتزغلل عين اللي تشوفها


هاتخلي الدنيا الغداره


تضطر وتلبس نضاره


ولو عندها مجلس وإداره


تيجي وتتقدم بكشوفها


وعيونك صبح


يطلع ويصبح ع الحاره


ويرطب أجوائها الحاره


وبالفرحه يدهنها محاره


ويرش ويكنس قدامها


وحُفرها هايقدر يردمها


ودا كل الحاره هاتخدمها


ماهي نظرة عينك سحاره


وعيونك ليل


ييجي بنسيمه وبيمسي


ويادنيا علشان ماتحسي


هانجيبلك ترابيزه وكُرسي


ونقولك أؤمري ياأميره


لو عايزه شاي مع تعميره


أو نفسك في كاسين م البيره


هايظبطوا دماغاتنا وترسي


وعيونك سهم


بحلم به نايم أو صاحي


لو يعلى يظبطلي صباحي


ولو يهبط بيكون دباحي


ماهي شركه وراسمالها إحساسنا


أرباحها راح ترفع راسنا


إفلاسها إعلان إفلاسنا


في خسارتي شريكه وف ارباحي


18 يونيه 2014