يافيلسوف الزمن إفتح كتابك شوف


واديني من حكمتك حبة دوا موصوف


بص الحكيم في الورق قاللي دواك موجود


علشان تعيش ياولد لازم يموت الخوف


...


نصيحه متأصله خليها نصب عينيك


خالط جميع البشر الموجودين حواليك


إن غبت تشتاقلهم


بالطبع يشتاقوا ليك


وان مُت تلقى بشر يبكوا بِحُرقه عليك


...


حكيم وقال حِكمته والكل بالإجماع


أكد وقال حكمته دوا جميع الاوجاع


ياإبني فيه حاجتين لابُد تحذرهم


إحذر لئيم لو شِبع واحذر كريم لو جاع


...


يافيلسوف الزمن ماتقوللي إيه مكتوب


إديني من حِكمتك يمكن أداري عيوب


شاف الحكيم في الورق قاللي دا حال مقلوب


بيتك قزاز ياولد .. طب ليه بتحدف طوب


...


يافيلسوف الزمن جرحي بجد عجيب


مانفعشي فيه الدوا ولا حتي عارفه طبيب


بص الحكيم وبألم قاللي عِرفت الداء


مافيش أبدا دوا للي في بلده غريب


...


يافيلسوف الزمن فعلك بقي مكسور


إبن الأصول جروه ونَصبوا المغرور


غريب وحاكم بلد بالفتحه والضمه


فاعل صبح مفعول وبفعلته مأسور


...



يافيلسوف الزمن ماتزيدشي ف جراحي


جرحي صبح سلوتي ف مسايا وصباحي


أدمنت طعم الوجع وعِشقت صوت الآه


لو الجراح بتنام ... جرحي أنا صاحي


...


يافيلسوف الزمن ماعدشي فيه إختشا


لما زماني دار سكن المرار في الحشا


بكى الغريب علي جرحي وجاني يواسيني


وحبيبي من فرحته بجراحي قلبه انتشي