بكل عيلة سورية ..

[B.A.R.C.A]

بكل عيلة سورية بتلائي هالأشخاص موجودين:


الشخص الخفيف الدم اللي بيسلي الئعدة
وعادة بيكون لسانو زفر شوي ومسمحلو يحكي شو ما بدو
طول ما هو عم يضحك البشر
وبيجي ع الئعدة نافخ ريشو
وشو ما ئال الكل بيضحك
حتى لو ئال صباح الخير

~ ~ ~ ~ ~

كاتب العيلة أو شاعر القعدة
بيكون عادة زلمة شوي كبير بالعمر من اللي بيعرفوا شو يعني كتب وقراءة
الزغار بيشوفوه ممل لأنهن ما بيفهموا عليه شو بيحكي
والكبار بيعدوا حواليه متظاهرين
انهن مهتمين ومبسوطين

~ ~ ~ ~ ~

نمامة العيلة
وهي عادة بتكون زوجة أحد الأعمام أو ولاد العمام
ما بعرف ليش ما تسألوني
هي اللي عندها الأخبار دائماً
بيحبوها النسوان وبيكرهوها وبنفس الوقت بيخافوا منها
بتحس هيي بأهميتها لما حدا يسألها شو الأخبار
و بتفرد حالها وبتبلش تذيع
وبالآخر بتئلك بالله لا تجيبي سيرة اني ئلتلك

~ ~ ~ ~ ~

غني العيلة
كل عيلة فيها واحد بيكون أغنى من الكل
وبكل عيلة بتكون مرتو مركز نظر النسوان شو لبست ووين راحت وشو عملت
بتحكي من طرف مناخيرها
و بتعّد ع طرف الكرسي كأنها ئرفانة
وإذا بتضيفها شي إما بترفضو أو بتاخدو بس ما بتاكلو ع أساس انها شبعانة ببيتها أو عاملة ريجيم
كلامها وأحاديثها لا تتعدى شو عملت الفلبينية
وكيف تخانقت مع السيريلنكية
وأديش الشوفير منشف دمها

~ ~ ~ ~ ~

مصرف العيلة
مصرف العيلة هو الشخص اللي بيجيب العار للعيلة بعمايلو السودا
ما بيطيئوه بس كمان بيخافوا منو لأنو بايعها ومو فارئة معو
بيكون عادة صحبة مع اللي بيشوف فيه مصدر هام للتنكيت

~ ~ ~ ~ ~

كبير العيلة
و هذا اللي بدك تسد بـوزك وتسمعو وهو بيعيد الئصة مرة ورا مرة
بحكيلك قصص أيام زمان وألعاب الزغار ولما كان بالجيش
نص ئصصو كذب بكذب
مو بيقولوا ما أكذب من شب تغرب إلا ختيار ماتت أجيالو؟
كان رح يشتري نص الشام
واللي حواليها انعرض عليه بألف ليرة
لما كان كيلو اللحمة بعشرين ئرش

~ ~ ~ ~ ~

متغرب العيلة
كل عيلة فيها على الأقل واحد بالخليج
بيجي بالصيف والكل بيكون يستنى الهدايا
لما يوصل بيلائي الكل متجمع والكل بيسلم عليه
وبتكون امو عاملتلو ورء عنب وكوسا
وشباب العيلة بينلموا
واشتئنالك وشفلنا شغل معك والله أخوك مو لاقي يحلق
كأنو المسكين صاحب شركة هنيك
طبعاً الكش وكترة الحكي بيزيدوا بهالفترة
وبيحكيلك عن سيارتو البورش وبيتو وبيكون عايش مع تلاتة بغرفة
بعد كم يوم بتلائية ئاع ع البرندة بالئميص الشيال
لحالو عم يشرب شاي
ولا حدا سائل عنو
وامو بالمطبخ عم تعمل مجدرة

~ ~ ~ ~ ~

عزابي العيلة
عزاب ونسونجي بنفس الوئت
بيكون حليوة (نسبياً طبعاً)
وبس يزور حدا من الئرايبين عندهن بنات بينضبوا
وبيصيروا يبصبصوا عليه من بعيد وبتشتغل المسجات
هادا بيكون عندو شوية غرور
بيعّد وبيحط رجل على رجل
وعادة بيصير عمرو فوء الأربعين وما تجوز
و بيضل يشتري سيارات بي إم على أمل انها تصيد شي بنت
بكل ئعدة بيحكي عن غرامياتو وبيتجمعوا حوليه شباب العيلة
وبيصير يورجيهن صور ومسجات
وكمان بيكون صحبه مع مصرف العيلة وبيسهروا سوا

~ ~ ~ ~ ~

شئفة العيلة
أحلى بنت بالعيلة
بتكون محط أنظار ولاد العم والخال بس هيي نظرها بعيد شوي
بتمشي يا أرض اشتدي ما حدا ئدي
و بتّعد مع نسوان العيلة مشان يصيروا يمدحوا جمالها
وما بيعجبها العجب وبتطول لتتجوز
هادا إذا تجوزت أصلاً

~ ~ ~ ~ ~

دكتور العيلة
وهادا المسكين اللي ما بيتهنى بئعدة
بس يوصل لمحل بيلتموا عليه، ويا أمي مو قدرانة وخواصري عم توجعني
و شوف يا بابا مبارح لما .. ( وبيصير يوشوش)
واللي بتنادي ابنها تعا ورجي الدكتور حلئك
هاتي معلقة خليه يشوف حلئ أخوكي
واللي بيعرض عليه راشيتات دكاترة تانية
واللي بيجيبلو صور أشعة
واللي بيئلوا شفلي ضغطي
طبعاً كل الئاعدين بيفحصوا ضغطون بعدو
و كل حياته بتكون هيك بغض النظر إن كانت زيارة أو عرس أو حفلة
طبعاً هو ما بيئصر
يمكن يصير يئلك مين الحمار اللي عطاك هاد الدوا ارميه وبكتبلك غيرو

~ ~ ~ ~ ~

كمبيوترجي العيلة
هادا طبعاً بعد طفرة الكمبيوتر صرلو أهمية كبيرة
بالأول كان الفاشل التافه اللي ما بيعرف شي
وضعو متل دكتور العيلة
وبتئول امو:
"بس ييجي بيزبطلك الكمبيوتر
والله ما في أشطر منو
امبارح خلانا نشوف عمرودياب"
و بييجي المسكين
شوف كمبيوتر ابن خالتك اللعبة ما عم تشتغل
و بيجي أخوه الزغير لصاحب الكومبيوتر
وبيتفرج ع الكمبيوترجي وهو عم يشتغل
وبيجي هالكمبيوترجي بيفهمو للولد انو مشان تئدر تلعب اللعبة يا حمار
لازم بالأول تشغّل الكومبيوتر

~ ~ ~ ~ ~

طفل العيلة الموهوب
ادا اللي بكل لمة بينادوه يغني
تعا غني لعمو غنية إليسا لو تشوفو كيف بغنيها
وطبعاً هالطفل ممكن يكون ما بيستحي
بتلائيه ئرفك وهو بيعيد بالغنية
وامو فرحانة فيه وكل شوي بتئول ما شاء الله
كأنو ما حدا خلّف غيرها
أو ممكن يكون من النوع اللي بتطلع روحك وامو بتقنعو يغني
ولك يلا ورجي عمو أديش انت شاطر
و بتصير انت بدك تخلص
بتئلو غني حبيبي بعطيك شوكلاتة
وبيكون بجيبتك شوكولا مفعوسة من عرس ئديم
بتورجيه ياها كنوع من الإغراء
وفي حالة كان دكتورالعيلة ئاعد بيجي التهديد المباشر
إزا ما بتغني الدكتور بيعطيك إبرة
بتلائيه صار يغني ونص أصابيعو بتمو
و بتصير امو تعطي أعذار وبتعصب عليه
مع انك بالبيت طول نهارك عم تغني روح انئلع من وشي

~ ~ ~ ~ ~

وهي ئصص العائلات السورية


​

 

[عكــ البيلسان ــيد]

لك نسيت الزبدية الصينية تبع العيلة
ابو فهمي يعني

 

[B.A.R.C.A]

لك نسيت الزبدية الصينية تبع العيلة
ابو فهمي يعني

لك اي والله

يللا المرة الجاية إن شالله



نورت عكيد
​

 

[like moon]

هه
لك ولله صحيح
آعدة عم اقرا لاموضوع لماما ونوزع الادوار على عيلتنا

يسلمووووووو​

 

[B.A.R.C.A]

​

هه
لك ولله صحيح
آعدة عم اقرا لاموضوع لماما ونوزع الادوار على عيلتنا

يسلمووووووو​

​

الله يسلمك يا غالية
​

 

[مختار]

غني العيلة
كل عيلة فيها واحد بيكون أغنى من الكل
وبكل عيلة بتكون مرتو مركز نظر النسوان شو لبست ووين راحت وشو عملت
بتحكي من طرف مناخيرها
و بتعّد ع طرف الكرسي كأنها ئرفانة
وإذا بتضيفها شي إما بترفضو أو بتاخدو بس ما بتاكلو ع أساس انها شبعانة ببيتها أو عاملة ريجيم
كلامها وأحاديثها لا تتعدى شو عملت الفلبينية
وكيف تخانقت مع السيريلنكية
وأديش الشوفير منشف دمها


ذكرتني بكتير شغلات انت

 

[B.A.R.C.A]

اي مية أهلا وسهلا ​

 

[{*B*A*T*M*A*N*}]

يخرب بيت هالعيلة شو كبيرة , بس أكثر شي عجبني أول واحد لما يقول صباح الخير الكل بيضحك .
​

 

[B.A.R.C.A]

وأنا أكتر شي عجبني مرورك​

 

[✿منى قلبي✿]

اي نحنا عنا منو ابو فهمي

هاد يا سيدي شو ما التلو وشو ما بدك بتلائي في

بيحكي وبيحكي وع نصائح

شي مظبوط وشي لاء

وكمان نسيت السلبطجي

هاد يلي وين في اكل بينزل وين في عزيمة بكون اول واحد

ولي على هلعادة شو كريهة


ميرسي
​

 

[STELLA]

يا زلمة عم تحكي الواقع مية بالمية

و أحلا شي هي اليبرق و الكوسا وقت حدا يجي من السفر

أمي لهلئ بتعملا

 

[B.A.R.C.A]

اي نحنا عنا منو ابو فهمي

هاد يا سيدي شو ما التلو وشو ما بدك بتلائي في

بيحكي وبيحكي وع نصائح

شي مظبوط وشي لاء

وكمان نسيت السلبطجي

هاد يلي وين في اكل بينزل وين في عزيمة بكون اول واحد

ولي على هلعادة شو كريهة


ميرسي
​

بادوكوا
​

 

[B.A.R.C.A]

يا زلمة عم تحكي الواقع مية بالمية

و أحلا شي هي اليبرق و الكوسا وقت حدا يجي من السفر

أمي لهلئ بتعملا

اي منيح والله
​

 

[JuSt RaMoOTa]

هه

اي والله كلو صح مية بالميــــــــة


​

 

[B.A.R.C.A]

اي أكيد
​

 

[نكهة جنون]

وانا شو بالله

​

 

[sweet-lolo]

ونعم العيلة بس مين ضل فهيم مابعرف
في كمان الست حشورة يلي بتتدخل بكلشي
وبتحشر حالها بكلشي
وبتصير الخطابة والداية وبتعمل حالها فهيمة زمانها وازا صار مناسبة ومانعزمت بتلاقيها اول وحدة موجودة
ال شو هي من العيلة وياما بيوت انخربت من ورا نصايحها ومن ورا العرسان يلي اختارتن

ونحنا عنا كمان ابو فهيم تبع الزبدية
يعني بيعمل حاله فهمان بكلشي وبقلك لاتشتري انا بجبلك ياها ارخص
وهو بكون رح يستفيد بشي نص المصاري وهو ما بيطلع بايده شي

انا تبع الكومبيوترجي والطبيب الكل بسألني على اساس انا فهمانة العيلة

والقائمة طويلة

يسلمو ضحكتني كتير
​

 

[أمورة سوريا]

ه
والله كلون صح

​

 

[Bilal Mohammad]

فعلاً واقع موجود بأغلب الأسر والعوائل السوريه

ششششكراً صديقي ..

 

[B.A.R.C.A]

وانا شو بالله

​

نئائة العيلة
​