بيلسان نت الان في الأسواق !!

[حسام الحلبي]

تخيلوا معي أتو الادارة أصدرت القرار التالي :


ان ادارة منتدى أرض البيلسان تفيدكم علما أن اليوم هو اليوم المجاني !!! الأخضر لدخولكم المنتدى وأنه ابتداءا من الثانية عشرة ليلا بتوقيت دمشق لن تتمكنوا من الدخول الى عن طريق بطاقات بيلسان نت ( بطاقة مسبقة الدفع ) الموجودة بالأسواق بأسعار رمزية ( 500 ليرة سورية ) ( 10 $ ) للمقيمين ضمن سوريا وللمغتربين أو العرب غير السوريين في الدول العربية والاجنبية عن طريق بطاقات ( ماستر كارد ) حيث سيتم خصم مبلغ ( 10 $ ) وذلك لقاءا اشتراك مفتوح لمدة شهر واحد فقط وبعدها ستتجمد العضوية تلقائا حتى يعاد شحن الرصيد !!!


دمتم بخير .............. تذكروا دائما شعارنا ( قلب محبة اخلاص الله يرحم ايام البلاش )



منرجع لموضوعنا الجاد يلي بحاجة لنقاش موضوعي اخي واختي العضوة لو صدر هيك قرار شو ردة فعلوا عليك وهل فعلا ستبقى أم تغادر المنتدى وخصوصا من ذوي الدخل المحدود يلي ممكن هل المبلغ البسيط يكون صعب شوي و لسا الشب باعتبار بيشتغل اسهل شوي بس البنت يلي مصروفها من اهلها يادوب مكفي

ياترى حبنا لبعض كأخوة بهالأرض وشوقنا لمواضيع بعض ومشاركات بعض والشات الأسبوعي وخنائتنا وأفراحنا واحزانا ممكن تدفعنا للاستمرار بهالمنتدى لو بدنا نقترض ثمن البطاقة أم اننا سنترك المنتدى الى الأبد ؟؟؟؟


بدي راي بصراحة ويكون واقعي وموضوعي وصريح الموضوع مو مزحة اكيد ممكن يصير ومو صعب وخصوصا ان المنتدى واكيد الكل بيعرف حاليا وسابقا بيدفع اشتراكات شهرية لوزارة الاتصالات​

 

[► Mr.Rami ◄]

أنا من جهتي بعد فترة بنزل موضوع

أربح غسالة lg في مسابقة أفضل شاعر

أو بلش بعطي قرض للشباب يلي ماعندون سكن يأمنو سكن ويسددو على دفعات دون فوائد

المهم بالمختصر المفيد بقبر الفقر



وذكرتني بخدمة عنا بيعرفنا أنوس


​

 

[§ أبو المر §]

ياسيدي هو صحي أنت طرحت موضوع للنقاش حسام

بس عبيت براسنا شغلات ماكانت على بالنا

أنا ماعندي مشكلة أكيد رح فوت لاني ما بقدر ماشوف حبابي وأصحابي كل يوم

 

[مختار]

هه
يحرء همك ياابو الريم
واللهي واللهي ياحسام انا بدفع 10$
مع انو مالي مضر كل شهر ادفع بس لاني بحب المنتدى
وبحب العالم يلي فيه
واحسن ماادخل ع فيس بوك وع مواقع شات
وكلها مسبات وعالم وسخة
لاء هون بعرف العالم مين هيه وبكفي انو رفقاتي
وكمان صاحب الموقع مافاتح هيك لالله خليه يسترزق شوي
شو وجع راس وعي كلو ببلاش والله ماكون بدالو لسكر البيلسان من اول ساعة
واسف عالاطالة وشكرن حسامو
بس شو بيخطر ع بالك هيك اسئلة ماكنت افهم
يعني ضروري تحرضو علينا لابو الريم هلئ

​

 

[ஃ MAGNUM ஃ]

ذكرتني يا حسام وقت رفعو سعر تنكة البنزين من 600 ل.س الى 800 ل.س
الموضوع بلش بأشاعه وانتهى بخازوق والمازوت كمان
فا شو مشان
​

 

[&OSSO&]

والله يا اخي حسام اتوقع في كتير من الاعضاء ينسحبو لانن راح يفوتو منتديات ببلاش

والله انا بل نسبة الي الاشتراك مو مهم انتا اكتر الناس تعرفني يا حسام

 

[مختار]

ذكرتني يا حسام وقت رفعو سعر تنكة البنزين من 600 ل.س الى 800 ل.س
الموضوع بلش بأشاعه وانتهى بخازوق والمازوت كمان
فا شو مشان
​

شو مشان رح بناكلها نحنى يابييييييييييييي
:19::19::19::19::19::19:

 

[سعد قيس]

حسام موضوعك رائع كتير

ومن جهة البطاقات الي تحدثت عنها فشي أكيد راح كون مشترك ولعدة أسباب
أولهن أنو مافي شخص بيقدر يبعد عن صحابوا
والتاني في ناس عم تدقع 200 أو 150 ألف ليرة سوري لحتى تتعلم وتدخل وتتثقف
واذا كان السعر متل ما ذكرت فبرأي أرخص
لأن هون كلشي متوفر كان من برامج أو ثقافة أو تسليه أو طرح مواهب ....ألخ

وبا النسبة لرد رامي ( خليها لاب توب من نوع توشيبا سعرو أغلى )

تحياتي ألك حسوم ملك
​

 

[سعد قيس]

ذكرتني يا حسام وقت رفعو سعر تنكة البنزين من 600 ل.س الى 800 ل.س

الموضوع بلش بأشاعه وانتهى بخازوق والمازوت كمان
فا شو مشان ​

دخيل عيونك :19::19::19::19:​

 

[حسام الحلبي]

أنا أكيد رح انصدم بالبداية ويمكن أتغيب عن المنتدى يوم أويومين بالكتير لبين ما اشتري البطاقة لانو بالفعل تعودنا عليكن ومستحيل نبعد عن بعض وبكل الأحوال لا يمكن الاستغناء عن أجمل منتدى

بس ياخوفي يكون رامي عم يراقب المشاركات واذا شاف الأغلبية موافق يقوم يتوكل على الله وينزلوا قرار العمى الأعضاء بيدبحوني ​

 

[سعد قيس]

:19::19::19::19::19::19:
قولتك بعدين خازوق مرتب
​

 

[Knight black]

حكيت اه فتحت علينا باب يبدو انو الادارة مفلسة وبلشت تفكر بهيك موضوع
وشغلي بلشت بل اعلانات
:19:
​

 

[قمر الشام]

:19::19::19::19::19:
الله عليك يا رامي دغري فكرت بالجوائز

أنا من جهتي رح واصل اشتراكي لانو بصراحة هالمنتدى انا بتعبرو متل بيتي
بلاقي في كل شي بدي يا والاهم من هيك انو عم بستفيد بكتير شغلات ومنفيد
وانو كمان الاعضاء يلي كلن اخوة التواصل بينن ولا اروع من هيك انا برأي البيلسان بيستحق انو كمل اشتراكي حتى لو صار غير مجاني

 

[موجة بحر]

بتزعلوا شي ؟؟؟؟؟؟ لا ما ح تزعلوا

لا ما بفوت
هلئ بربكن ما بيكفي فاتورة التلفون والبطاقات والنت البطيء اللي بيعل القلب ولسا كمان اشتراكات
حتى انتوووووووووووووا علينا مو حاجة الغلا واللي نحنا فيه
بروح باخدلي ب عشر ليرات بزر وسنارة وبقعد عالشط بفصفص بزر وبصيد سمك وابيعن مشان جيب البطاقات و اقدر فوت عالمنتدى

 

[سعد قيس]

:19::19::19::19::19:
يحرء ديبك يا موجة :19::19:​

 

[مختار]

:19::19::19::19::19::19::19::19:
وينك ياحسام عجبك مو

 

[الحرالباكي]

تعقيب عام للجميع

يا شباب الموضوع فكرت الاخ حسام والتعقيب على رد الاخ رامي أو غيرو بيكون ضمن المشاركة بكلمة ملخصة وفعالة بما أن الموضوع قابل للنقاش مش للشات والحكي الي فيه مدح أو ذم الرجاء التقيد بقواعد النقاش مع فائق الود

أما في ما يخص الطرح
اخي الكريم حسام أنا بصراحة قرأة الموضوع والردود بشكل جيد
ولا أخفي الجميع القول بأنه لو لا سمح الله حصل ..!
وأنا أبشر بحصوله ولو بعد حين من الزمن بأن الجميع سيشتري
البطاقات الانتمائية ولو بمبالغ مرتفعة إذ لا يخفى على أحد منا بأن النت
والتواصل مع الاعضاء يصل بنا إلى مرحلت الادمان لو جاز التعبير
هناك من سيقول لي الادمان له علاج أقول له نعم حين تدمن الاشياء السيئة
قد تفكر في يوم بطلب العلاج ولكن حين تدمن العلم والمعرفة والتواصل مع أهله
صدقني فلن تقوى على ممانعت هكذا إدمان ...؟
هذا ما أستخلصته من تجارب لي ولأصدقاء على هذه الشبكة من بدايات الانتشار ألى يومنا الحالي.
لكم صديقي ولكافة الاخوة كل الشكر​

 

[حسام الحلبي]

لو كان منتدى جديد ومافي أعضاء أكيد ماحدا رح يشتري بس بعج مرور حوالي سنة وثلاثة أشهر من عمر المنتدى و 8000 عضو وأكثر من 700 عضو نششيطين ومواضيع ومشاركات ضخمة لا أن أنه من السهل الاستغناء عن هذا المنتدى مع الشكر لجميع الاراء​

 

[الحرالباكي]

لو كان منتدى جديد ومافي أعضاء أكيد ماحدا رح يشتري بس بعج مرور حوالي سنة وثلاثة أشهر من عمر المنتدى و 8000 عضو وأكثر من 700 عضو نششيطين ومواضيع ومشاركات ضخمة لا أن أنه من السهل الاستغناء عن هذا المنتدى مع الشكر لجميع الاراء​

أسف على المداخلة
ولكن نرجو منكم توضيح الكلمات الملونة

شكراً​

 

[حسام الحلبي]

قبل التصحيح :

لو كان منتدى جديد ومافي أعضاء أكيد ماحدا رح يشتري بس بعج مرور حوالي سنة وثلاثة أشهر من عمر المنتدى و 8000 عضو وأكثر من 700 عضو نششيطين ومواضيع ومشاركات ضخمة لا أن أنه من السهل الاستغناء عن هذا المنتدى مع الشكر لجميع الاراء


بعد التصحيح :

لو كان منتدى جديد ومافي أعضاء أكيد ماحدا رح يشتري بس بعد مرور حوالي سنة وثلاثة أشهر من عمر المنتدى و 8000 عضو وأكثر من 700 عضو نشيطين ومواضيع ومشاركات ضخمة لا أظن أن أنه من السهل الاستغناء عن هذا المنتدى مع الشكر لجميع الاراء




خيو أخطاء املائية لا تدقق مشرف ثقافة عامة واخطاء املائية

ياريت تصلحهن ​

​