خطبة تقليدية

[Gabriel]

خطبة تقليدية


​

معلومكون بس تقرر شي عيلة انو تجوّز ابنها , بتتحول الاسرة بكاملها من زغيرها ل كبيرها و حتى المأمّط بسريرها ل فريق بحث متضامن و متحد رافع شعار \عروس ما باس تمها غير أمها\ اي و مع شوية حسب و كمشة نسب​

و بتبلّشلك بقا سيدي أم العريس قائدة المعركة إتّصالاتها و بتسأل و بتستفسر : \عمر الصبية , دراستا , لون عيونا , بشرتا , طولها بالسنتيمتر و من دون كعب ها !!!\
​

في حال كانت أم العروس مبيضة وجها و ببنتها بيضة شق اللفت عيونها زرق سنانها مو فرق , بتستلم هي القيادة و بتسأل : \كم مفتاح المحروس عندو ؟؟\
​

و الجواب المطلوب عالاقل : \مفتاحين , بيت ملك لحالها و سيارة , يفضّل موديل حديث\


بالمرحلة التانية بتلاقي الشب نفسو يلي كان واقف على مدارس البنات الصبح قاعد ب بيت العروس عينو بالارض متل الاوادم , خجوووووووول , يقبر أمو​

و العروس عم تفرك ايديها خجلانة و بس يروحو الجماعة بتنط عالتلفون لتحكي مع رفقاتا و توصفلون عريس الغفلة من راسو ل ساسو​

البطلة المحورية ب هالقصة هي القهوة , يلي تعتبر الشيفرة تبع كل هالقعدة , رح قلكون شلوووون !!!!​

العروس : اذا سألت بعد ما فاتت ب شوي عن قهوة الجماعة , اي بيكون العريس ما عجبها منوب , اما اذا طوّلت لتجيبها رغم نكشات و نعرات أمها ف بيكون الضرسان عجبها​

ام العروس : اذا طلبت من بنتها انو تجيب القهوة بسرعة معناها \الجوازة دي مش ممكن تتم\ , أما اذا قالت ل بنتها \ماما شربينا قهوة أهلا و سهلا\ ف معناها رووووووووح يا صهر شايفلك​

العريس: اذا تنّح و ما رضي يشرب قهوتو , معناها حتما مافي أي بصيص اعجاب , اما اذا شربها و قال بالحرف الواحد \قهوتكن طيبة\ معناها أكل​

أم العريس : اذا شربت القهوة معناها العروس \و الله سكرة و دابت بقلبي\ اما اذا ما شربتها معناها الأم رح تكلل ابنها بالغضب اذا تمت هالجوازة​

و بعدا بيبلش الشغل ب بيت العريس , و كل مين سمع ب كنية العروس فرك جبينو و بلّش يتزكر , انو هو مين بيعرف من هالعيلة ؟ و على فرك جبين , و بيصيرو يسألو هالجيران و الاقارب عن سمعة البنت و مشاويرها


​

و بعد استكمال الأقوال , يرفع المحضر لعند أبو العريس و بس يقول : \والله و النعم\ , بتركض مرتو بتدق تليفون لأم العروس و بتقلها : \نحنا حبيناكون و اذا حبيتونا اسألو عنا\
​

و من هون بيبلشو بيت العروس يسألو بس معلومكون الشب ذنبو مغفور , يعني بيسألو أديش معو , و مع أبوه بعد عمر طويل يعني



و بس يجمعو المعلومات من فلان و علان , تنتظر ام العروس اتصال أم العريس وبس تقلها : \والله أفنديي (يعني جوزها) حابب يتعرف على أفنديكي\​

بتجاوبها ام العروس : \اي ميت اهلا و سهلا , بتجو لبيتكون الزغير\​

اكتر المراحل حساسية هي مرحلة فصل النقد بقا سيدي , و هون اهل العريس بيسألو عن المقدم و المؤخر و ملبوس البدن و هالحباشات , ف بيجاوبو اهل العروس الجواب الودي التقليدي : \البنت بنتكون\​

ف بيقول ابو العريس : \اوووووووووووووه و الله حمّلتونا حمل انشا الله نطلع قدو\
​

و بيزت رقم , طبعا ما بيعجب اهل العروس و بتبلش المناوشات و ابو العريس بيقول : \عليي الطلاق ما بدفع اكتر مما دفعت لأخوه\​

و ام العروس بتقول : \والله بنتي إجاها كتير و قليل\​

و ابو العروس بيقول : \انا بنتي ما بتتقدر بالدهب\



اما العريس و العروس ف بيعدو لا من تمّون ولا من كمّون , عم يستنو حدا يبت ب أمرهن​

و بس تخلص المعركة تمام بيتبادلو القبلات و عبارات الود , و يعلو صوت الزغاريد , و يتم إطلاق سراح كاسات العصير القابعة في المطبخ



و بتقعد العروس ب جنب عريسها و بتصير حماتها تمسحلها ع شعراتا ب حب و حنان , و بعدين بيحددو موعد اجتماع الرجال و كتب الكتاب ​

و انشا الله ألف مبرووووووووووووووووووووووووووووووك​

​

 

[سِدْرَة المُنتَهَى]

طويلة حكاية الخطبة بس اهم شي بالاخير تمت على خير

 

[إلهام]

يعطيك العافية
حلو كتير الخطبة

 

[ḾǑŏǑŏǓĐỸ]

 

[B alaa B]

هيك العادات تبعنا

بس منيح يلي تمت

شكرا الك

 

[Tobiza]

مشواااااار هالخطبة​

 

[لكبړيآئي قصھہ]

الئهوة هية الشيفرة لكل الئعدة

زكرتوني وئت اجا خطيبي ليخطبني طبعا خطبة عن حب



على ئد مو انا جئرة وشخصيتي شوي ئوية


يومها فتت بالحيط وماعرفت ضيف الئهوة اول مافتت حترت مين بدي ضيف بالاول هجمت على ماما وضيفتها اول وحدة

ووئت صار دور ضيف العريس رحت ضيفو دلئت (وئعت) الئهوة عليه


وتم النصيب


لذلك نصيحة لكل الصبايا بس يجي العريس وئعو الئهوة عليه​

 

[mr_ops]

ولي كل هااااااااااااااااد ... الله يسسسسسسسسسسسسسستر

 

[ندى القلب]

الف مبروووووووووووووووك عقباااااااااااااال العاايزين يااحباايب


يسلمووووووووووو غابي خلي هالعالم تتعلم شوو مستنيها​

 

[Gabriel]

هلا فيكم جميعا
بس بلا ماتكبو قهوة


​

 

[دموع الورد]

المهم بعد كل هالعجئة تم النصيب

والف مبروووك وعقبال عند كل مشتهي
​

 

[اميرة الشام]

طويلة كتير الخطبة

بس تمت على خير

يسلموووو ​