من الأمور إللي تطيح دائماً بالموظف هو ادعاؤه بأن الراتب ما بكفّيه إلاّ عشر أيّام عَ الأغلب ..وأن من أمنيات إللي خلّفوا الموظف أن يظل معه الراتب إلى آخر الشهر ..!! ولعلمكم ..العوج كلّ العوج من الموظف ..هو إللي مش عارف يدبِّر أموره ..هو إللي ببعزق بالمصاري شمال و يمين ..هو إللي نازل يتشبرق ويصرف وياكل وجبتين و يلبس جرابات مغسّلات و لمّا يطلع بالسرفيس و الشوفير بدّو يرجع له ( القرشين ) ؛ الموظّف يقولو ( مسامح ) ..!! ليش هاي البعزقة ..ليش ليش ..؟؟ ما تقولي أجار دار وفوط و حليب ..هذا كلام فاضي ..!! وما تقولي مَيّة وكهربا وغاز وكاز وغراب بين ..هاي حُجّة المفلِّس ..!! الراتب إللي بتعطيك إياه الحكومة بكفيك و زيادة ..بس إنت يا موظف إيدك فِرْطة ..!!
وعن تجربة وقناعة ..فقد قمتُ أنا الموظف زيّي زي باقي الموظفين بتجربة صغيرة ؛ وقد نجحت بإبقاء جزء كبير من الراتب معي لآخر الشهر ؛ ولو شدّيتْ حالي شوية ممكن يظل معي للشهر الثاني ..!! والخطة ببساطة كالتالي :- ..مش ينزل راتبك عَ البنك ومعك بطاقة صرّاف آلي ..؟؟ حلو وحلو كثير ..لا تسحب الراتب ..ولمّا ييجي عليك صاحب الدار تحجّج بإنو فيه خربطة بحسابك وإن شاء الله هاليومين تنحل ..!! ولمّا تحتاج شي من الدكانة اسحب منها بقوّة قلب ..ولما يطلب منك الدكنجي ؛ ابتسم ( ضروري الابتسامة ) و قل له : يا زلمة مِشْ بينا..!! ولمّا ولمّا ولمّا...المهم زوِّغْ قد ما تقدر من كل اللي بدهم منك مصاري ..!!
الآن بإمكانك ..طول الشهر تسحب كل اسبوع خمس ليرات أجرة مواصلاتك و حق السندوش و كاسة الشاي ..يعني عَ الغالب ما رح تصرف طول الشهر عشرين ليرة..وباقي الراتب لسّة مخبّى بالبنك ..وإذا بدّك تسحبو عشان بس تلعب بالمصاري كل يوم ؛ ما فيه مانع ..بس أوعى تصرف منهن غير إللي اتفقنا عليه..!! يعني بإمكانك كل يوم تمسك راتبك بإيدك و تقف قدّام المراية وتنظر إلى المصاري و تضحك ؛ اضحك على كيفك ..اضحك ولا يهمك ..وبعدها تروح تخبيهن بسرعة ..!! وكل ما ييجي على بالك تضحك من قلبك تروح إتْطُوْل المصاري وترجع تقف قدّام المراية و تبلِّشْ مسلسل الضحك من القلب ..!!
طبعاً الأمور ممكن تزبط معك شهر أو شهرين عَ الكثير ..بس بعدها لا بدّ إنو الدين تراكم على قلبك ..ورح تدفع الأوّل و التالي ..بس تكون حققت أُمنية قديمة عندك ..إنّك تخلي راتبك معك لآخر الشهر ...!! كيفني معك ..حُطْ هبلي على هبلك وقول يا الله ..!!
كامل النصيرات..
انا ما دخلني 
