يوميات المحروسة لطفية .. تعود من جديد

[جمانة]

مرحبا جميعا .. انا بتأسف كتير اني انقطعت عن القصة
بس والله حبل افكاري انئطع
بس ان شاء الله حابة كملها بمساعدتكون
و هون رح جمع كل الاجزاء لحتى الاعضاء يلي ما بيعرفو لطوف
يتعرفو عليها هلأ :10:
و بتمنى تستمتعو فيها :10:
و يلي قراها من قبل يقراها مرة تانية
لحتى يشجعني اني كملها
محتاجة تشجيعكون بس
تؤبشوني :10:​

 

[جمانة]

الام : ولك لطفية يا لطفية

.. وينك ولي الهي يعدمني ياكي ان شاء الله

البنت : الي ليكني يامو خير اؤمريني

الام : روحي اكنسي الارض اوام قبل ما يرجع ابوكي .. يلا ع السريع لشوف

البنت : اي امرك :80:

لطفية عم تتوتت لحالها : اي العما شو هالعيشة هي لسه شطف و طبخ و نفخ لك ايمتى اتزوز و اخلص من هالسجن بئا :10:

اشششششش....تششششششششش...اشششششششش .....تشششش (صوت المكنسة القش عم تكنس الارض ومع دلء سطل المي على الارض)
الام: استعجلي لك امي...ما بقا الا يجي ابوكي...

البنت : طولي بالك عليي لك يا مو...من وقت تلوع السمسات وانا ما عم اهدا...

الام : يلا خفيها...وبلا كتر حكي.....شهشلي اوام...

البنت : امرك يامو على راسي

طرررررررررررق طررررررررررررررررررق...

البنت وهي تمسح ايديها وكفيها على جوانب خصرها بفستانها المرفوع بزنار كي لا يتسقسق بماء الشطف :19:

البنت بصوت عالي : ولك مينو هاد؟؟؟؟؟

الصوت من وراء الباب : السلام عليكم...نحنا خطابين لك اختي.... دلونا قال عندكن بنات للخطيبة:10:

بتركض الام من اربعتا على الباب وهي عم تقول لبنتها : روحي روحي ولك لطفية اوام زهزيلي حالك

وتفتح الباب الام : لك اهلين وسهلين بهل آمة وهل عين...تفضلي لك اختي تفضلي...

وتدخل ثلات من النساء واحداهن تقول بابتسامة صفراوية تتبعها رمقات للام من فوق لتحت : اهلين تؤبشيني

مووه مووه .. مووه مووه ...( حزفت بقية بوسات النسوان حرصا على عدم الاطالة...بتعرفو بوسات النسوان ما بدو مين يحكيلكن) :19:

الام بينها وبين حالها ( ولي على امتك شرأتيني من فوقي لتحتي..اسم الله حولي وحوليي من عينك) :80:

تفضلو تفضلو لجوى على الديوان....والله القعدة بارض ديار انشط واحلى...و هالوردات مفتحين بتعرفو حاكم الجو هلأ بيجنن :10:

وحدة من النسوان تقول بنعومة : اي والله شايفة لك اختي..الله يسترنا من نار جهنم....شي شوب نار...حما الله وكيلك...كش برا وبعيد ...

ترد التانية عليها : اي والله لك اختي..(ثم تنظر الى فيء شجرة بجوارها وتقول ) بس فيء هل شجرة كتير ظريف تؤبشيني...مفيمة على الديوان كلو....تسليم الله والنبي

وهن يتحاورن بموضع الشمسات والشجرات تدخل الفتاة لطفية...وهي تحمل صينية القهوة مع كاس من الماء البارد...
ومن ثم..

يتبع ​

 

[جمانة]

لطفية( عم تكفر بالعبري) يلعن ابو هل الشغلة كل يومين التالت بتنطلي شي أم صطيف ..شي أم اربعة واربعين ..شي أم بريص

وركدي يا لطفية..سسوري شعراتك....تبرفني...لبسي كعب اي و الله رح يطئ ضهري..مشان 10 سانتي اي و الله ألله ما قالا ! ​

وعدي تزكري تعليمات الست الوالدة الله يحفظها ​

اوعك اوعك ها...تطفطفي قهوة .. بيحكو عنك شرنة

بتلبسي احلى واعة على بدنك..يفضل جلد النمر...و كل ما كان محزئ و ملزء مكسم و شافف بتزيد علاماتك و فرصة اللحاق بالقطار :10::19:

بتنفشي شعرك سواء كان شعرك طويل قصير او صلعة ما بتفرء .. و لو بتحطي شي بروكة شقرا بيكون احسن

ازا اجو على غفلة و مالك متحممة بتغطسي بانينة البارفان :19:

ازا سمرة بتحطي مبيض لتبيضي..ما بدنا الناس تئول انو بنتنا حلوة بس سمرة !

بتعلمي حالك مستحية غصبن عنك ...ما عنا بنات قاتلين حالون ع الزوازة

بعدها لطفية فاتت لعند الجماعة .....بعد ما راجعت تعليمات الست الوالدة وهي عم تتمايل وتتمايع ......ورجليها رجل رايحة يمين ورجل رايحة شمال :10:

يتبع ​

 

[جمانة]

ام صطيف : يو تؤشيني...خجلانة.؟؟؟

ام اربعة و اربعين : تركيها تقبريني....شوفي شلون جلد وشها رح يهر من الخجل.... :10:

الام : اي والله يا جماعة بنتي كتير خجولة...لا عندا لا فوتات ولا طلعات تؤبش قلبي :10:

ام بريص : اي واضح واضح تشكلي اسي...ونعم الترباية.....

كرع كرع كرع......كرع كرع كرع ( صوت كرع القهوة )

ام صطيف : ان شاء الله دايمة القهوة...

الام : تسلميلي انشاء الله صحة وهنا...

يتغامزن الاخوات الثلاثة ثم تقول كبيرتهن ام اربعة و اربعين : ياريت تناديلنا الامورة من جوا

الام : اي من عيوني....( ولسا ما خلصت الام جملتها بتنط لطفية) :19:

لطفية : شو يامو ناديتيلي ( وهي ماسكة ايديها وراخية بنظرها على الارض...قال تقبروني خجلانة ) :10:

ام بريص : قربي تقبريني لعندي قربي شوي :10:....يسلمولي هل شعرات يلي هادلين على كتافك متل ما بيهدل الشلال بالوادي

لطفية : اخخخخخخ....

ام بريص : يو تقبريني ما تاخزيني علق شعرك باسوارتي الدهب

لطفية : مو مشكلة خالة :80: ( قال عندا دهبات يعني...يبعتلا حما هي واسوارتا....هي حركات خطابين....انا يلي بعرف...بدها تشوف ازا كان شعري شعري ولا حاطة باروكة....يو تتأمعي الهي)

ام صطيف: تعي تعي حبيبة قلبي تعي عدي جنبي انا :10:...شحني مو حاطة لا اسوارات...ولا حتى عقدي شيت الخمس متار ...حاكم الله وكيلك يا اختي ام لطفية ابن عمي منبه عليي ما اطلع وانا مشكشكة بالدهبات والالماس .....حاكم يقبرني بخاف تطرقني عين...لا سمح الله....حنون يقبرني... :10:(تتغما بعيونها شوي بغلاظة ثم تتابع)
يوه..!!....شبكي يا امورة...يلا تقبرني لطفية...عدي جنبي عيوني انتي :10:

لطفية بتبتسم وبكل هدوء بتروح بتقعد جنبها ( من وين رح تعمليني حبيبتك وروحك...ناقص تعمليلي بالحكاية مجنون ليلى كمان..يا حبيبي على كولكة النسوان...ما بتخلص...شو بحبو يمسحو جوخ :80:)

الام عم تتطلع وهي ساكتة وعم توزع ابتسامات كنا كن يلي عم يعمل دعاية معجون سنان ( هلا بدها تفهمني انو جوزها ملان وممتلي....انا شو بدي بجوزها...تنباع بالعزار هي وهو....انا بدي اعرف وضع جيبة العريس...يوووووو تتحورء) :80:

يتبع ... ​

 

[جمانة]

لطفية مستحية :10:..و هي عم تجاوب على أسئلة اللجنة بصوت ناعم ..وابتسامة زغيرة من دون ما تفتح تما مشان ما يبينو سنانا الفرئ

و الله سشورتلكن الغرة و لفتا ع السريع :19:....كل ماسألوا سؤال بتئول...:ايه...مزبوط خالة :10:.... وبتهز راسا بتقوم بتنهز معو الغرة..كلياتا سوا:19: ​

وهنن عم يحكو مع الست ام لطفية عن المستشفيات وارتفاع سعر المازوت و غلاء السكن .. لطفية فجأة نطت

يييي عليكي يا لطفية و على هالنسوة نسيتي تحطي العدسات الخضر ..عجبكن هلا طاروا الزباين :80:..عفوا قصدي طار نصي الحلو..! :10:

اي و الله مليت من هالسيرة..على تعي عدي حدي و فرجيني شعراتك و جيبي القهوة
​

ما بيعرفو انو الدنيي تغيرت وصار لازم يجيبو معون البضاعة :80: ( العريس طبعا :19: ) لحتى اعملو معاينة

انشالله يطلع دئنو متل هداك الولد يلي كنت حبو ايام المدرسة ..و ألو سكسوكة مدحت و انف دياب :10:

اي و الله انا كمان ما خليت حدا من شباب الحارة يسلم من شري قصدي من جمالي الخلاب

و يا ما طلطلت عليون من هالشبابيكواعدت بالكافيتيريات و شي ع الباب نتبادل النظرات الحب و الاعجاب

اي يبعتلن حمى و لا واحد عندو شجاعة ليعترفلي بحبو

معئول شو صايريين شباب هل الجيل بيستحو

يعني لازم البنت تروح ركد لعندون و تقلون الكلمة السحرية

و الله ما خليت و احد ما طبئتو ورقم موبايلي شحو كاتبتو على شباك غرفتي :80:

ولك ازا خايف ع الفواتير لا يتصل يعمل مس كول بس .... انا برجع اتصل فيه :10:

مزوئة انا مع المحبين حرام اكسر بخاطرون شو ما عندي اخوات شباب انا... ​

مين رح يصحلو هالجمال والعيون الخضر او الزرق او البنفسجي ..كيف لكن...انا لطفية مو حيا الله ​

يتبع... ​

 

[جمانة]

بهالاثناء لما لطفية بتندب حظها و ماضيها المشرف مع شباب الحارة

بيلمع طرف عين ام لطفية و هي عم تبتسم هديك الابتسامة المفششة تفشاية ..!!!


ام لطفية : بالله و بلا صغرة المحروس إبنكون شو بيشتغل ؟؟!!!...


أم اربعة واربعين : يؤبر ئلبي إن شاء الله ،، هادا يا أم لطفية خانم ،، إبنا ( ابو الروض ) على سن و رمح ، عندو عرباية وببيع فستق و بزر و بوشار ، بنص الطلعة تبع سوء الجمعة ،، يعني بأيدو مصلحة بتأص الدهب أصصصص !!!... :19:


ام لطفية : - و عيونها طالعة متر عن وشها - بياع فستق ( تروح عينو !!!...)، أيه أنعم و أكرم و الله !!!.. :80:


أم صطيف : هو صحيي ما كمل دراستو ، و طلع من صف السابع ،، بس يشكل آسي ، فتح و زكي ، و بيفهم بالأصول !!... :19:


لطفية: - عم تحاكي حالها - ( كمان مو دارس ،،، يا حبيبي .. يا حوينتك يا لطفية!!!...)

ام لطفية: اي و الله ،، هو مبين من ركازتكم أنكون عيلة بتفهمو بالأصول و الواجب ( ماحدا بيأول عن زيتو عكر !!!.... :80
و بترجع بتكمل ام لطفية حديثها ...
وويعني مشان السكنة وين ؟؟؟!!!.. و لا لسا مو حاسبين حسابكون ؟؟!!...

أم بريص : ( و الله ما بدكون إلا سكنة لحالها كمان !!.. على شو يا بعدي على هالطول الفارع :80:،،ولا على هالشعر المنكوش .. ولا على هالعيوني الحولة و لا على هالأنف يلي متل أنزوعة غطى الطنجرة :19: !!!!....) لااا ، يوه معئول ما نكون عاملين حسابنا على السكنة !!!!...


أم اربعة و اربعين : و الله يا ام لطفية خانم بتعرفي شلون أسعار البيوت هالأيام ، يعني الله يكون بعون الشباب يا حق !!...


ام لطفية : أميييين !!!.. شايفة شايفة و الله الشباب مالون عرفانين وين بدون يروحو بحالهون ....


أم صطيف : مشان هيك ساوينالو غرفة على الأسطوح ،، بالبيت العربي عنا ...
و ازا الله يسر بدنا نكملو حمام صغير بشئيت الغرفة !!!....
و بيستعملو المطبخ تبعنا نفسو ، يعني الطبخ مالو سألة ،،، و لا أنتي إلك فكر تاني ؟؟!!!!...


لطفية : - كمان بينها و بين حالها - ( يووو يبعتلو حمى يلي دلاكون علينا !!!....)


ام لطفية : أيوووووووه ،، يعني السكنة معكون ،،، و بغرفة عالسطح ،، و الله ما بعرف أبو لطفية شو رح يكون شورو بهالموضوع ....

يتبع .. ​

 

[جمانة]

و بعد ما بلشت المناورات و الحديث عن العريس المصون و مواصفاتو الجزابة ( يؤبش قلبي ابو الروض ) :10:و بهالاثناء لطفية عم تسمع و تلطم ع خدها من القهر

ام صطيف: هو بصراحة يا اختي ام لطفية اخي مصمدلو قرشين ناوي يفتح فيون بيت .. بس بتعرفي هلأ البيوت سعرها كتير غالي .. فبدو كمان كم سنة لحتى يجمع حق البيت

ام لطفية : اي اي معك حق اختي .. الله يعطيه العافية و ينولو يلي ببالو .. بس ما شاء الله حولو و حواليه شكلو شغيل كتير لحتى قدر يطالع حق بيت من ورا عرباية فستق

ام بريص: ( رح تطرقلي ياه عين ولي على امتها..قل اعوذ برب الفلق ) اي ما شاء الله ولا قوة الا بالله...يؤبر قلب اختو....اخي تعيب ياست ام لطفية ...من الشغل للبيت ومن البيت للشغل...ما عندو طلعات هيك وهيك الله يرضى عليه ويوفقو..

ام صطيف : اي كمان اختي واحد صرلو هديك الحسبة بالمصلحة .. اكيد بدو يطالع حق بيت ..

لطفية عم تحكي مع حالها : هديك الحسبة .. ( العما بقلبو العما ) .. ليش اديش عمرو المحروس

ام لطفية و كأنها قاعدة بنص قلب بنتها : ليش اديش صرلو المحروس بهالشغلة .. الله يوجهلو الخير الهي.. :80:

ام اربعة واربعين: بدك تقولي شي 30 سنة يعني .. ما شاء الله حولو شغيل ريتو يشكل آسي الهي .. من لما كان صغير كان حابب هالمصلحة ويضلو ينئ فوق راس ابي لحتى يجيبلو العرباية .. يؤبش قلبي الهي.. :10:

ام لطفية : 30 سنة .. ( تروحو دحكلة الهي ) .. شو باينتو العريس من اول ما وعي على الدنيا و انتو حاطينو بهالمصلحة.

ام بريص وهي عم تضحك ضحكة صفراوية هي هي هي هي : يحرء حريشك يا ام لطفية شو دمك خفيف ....شو من اول ما وعي على الدنيي...ما قلنالك انو طلع من صف السابع من المدرسة....قلنالك ولا ما قلنالك....؟؟؟....قلنالها ولا ما قلنالها يا صبايا ​

الجمع : قلنالها لك اختي...قلنالها ​

ام لطفية و علامات الاستعجاب باينة على وشها : ليش المحروس اديش عمرو بلا زغرة...؟؟؟!!!!

ام صطيف : يعني بدك تقولي فات بالاربعين هلا.....والله مي متاكدة...مدري هلا مدري قبل بكم سنة...والله العمر ما عاد فيه بركة يا جماعة...شو هل حكي...اي ما عاد فيه بركة بنوب بنوب ​

لطفية ( يو تتقوصو.. ..شو شايفيني عوكة ولا ناقصة ايد ولا رجل لا سمح الله لحتى بدكن تجوزونا رجال اد ابي .....تروحو فرم ....يا حوينة السسوار...والله كان حقو مصاري)

ام لطفية (سكنة باسطوح و عريس ختيار....شو شايفيني عم دلل على بنتي بسوق الجمعة انا) ​

يتبع .. ​

 

[جمانة]

وبعد المناوشات و المناورات رحلت كل من الاخوات ام بريص و ام اربعة واربعين و أم صطيف على امل انو لطوف ست الحسن و الجمال توافق على ابو الروض على سن و رمح

أم لطفية : يتقوصو الهي هنن و هيك عريس .. ليش شو مفكرين بنتي بايرة ولا شو

لطفية : اي شو بدك فيون يامو .. اي انا لو توقع السما ع الارض ما باخدو لهالمقصوف الرقبة :80: .. لك انا لطوف يلي كلي دلال و جمال :10: آخود واحد اد ابي .. اي ما حزرو :80:

أم لطفية : لك تؤبشي قلبي انتي شو حلوة .. طالعة لامك :10: .. اي والله والله ما رح جوزك الا العكيد ابو العز .. تشكلي آسي الهي .. انتي بيلبئلك عكيد يشكلك بالاساور و الدهب

لطفية مستحية :10:: لك يامو شو عكيد ما عكيد .. انا ما بدي لا العكيد و لا ابو الروض :80: .. انا بدي اتزوز عن حب

ام لطفية : حبك برص الهي .. وليك لطفية ما تكوني شايفتيلك شي شوفة يا مقوصة..؟؟؟ .. والله بسابع سماه لو اسمع انك عاشئتيلك واحد لخلي ابوكي يحرمك من شوفة عتبت الباب .. وخلي اخوكي شوكت يئتلك بنص الدار و يجرك من شعراتك

لطفية : لك شو شوفة ما شوفة يامو :80: .. ليش اخي شوكت عم يخليني اطلع من البيت .. اي من لما شاف مدحت :10: ( يؤبر قلبي مدحت هو و غمازاتو ) يتحركش فيني ( اي يسلملي هو والحركشة تبعو ما احلاها ) حرمني شوفة الباب

ام لطفية : شبكي عم تحكي هيك تضربي انتي و مدحت معك .. يلا اوام روحي غيري اواعيكي وتعي ساعديني بالغدا

لطفية : اي انتي شو وراكي غير تحكيلي تعي اعملي هيك وتعي اعملي هيك .. شو هالعيشة يا

طج طج طج طج ..صوت الباب عم يندق

ام لطفية : ولك لطفية .. لطفية .. يا لطفية .. لطفية وجع الهي وينك ولي

لطفية : اي ليكني يامو شو في ؟؟

ام لطفية : روحي شوفي مين ع الباب .. :80:

منوووووووووووووهااد .. لك منووووووووو هااااااااااااد ..

زييييييييييييييق ( صوت فتحة الباب ) :19:

لطفية : لك هادا انت .. لك شو جابك لهون .

نصار : لك ايه انا .. لك ايه ايه انا .. ما عاد فيني صبر يا لطفية ماعاد فيني صبر

لطفية : لك يوه ولاك نصار :10:.. روح هلأ روح :80:.. والله اذا اخي شوكت شافك هون والله ليدبحك ويشئفك

نصار : بااااااااااااااااطل عل رجال ... شو هالحكي .. اخوكي شوكت هيك بدو يعمل فيني .... لك أأاااخ أااااخ بس لو ما كان أخوكي بس ..

لطفية : ولك نصار روح من هون عم قلك :10:

يتبع .. ​

 

[جمانة]

أم لطفية ( من جوا البيت ) : لك شوعم تعملي على الباب ولك لطفية .. مين يلي ع الباب

لطفية : لا يا مو لأ .. .هادا زبال الحارة أبو حدو قال بدو الزبالة من عنا

نصار : زبااااااااااااال .... لك زباااااااااااال يا لطفية زبااااال .. لك أخخ اخخخخخخ

لطفية : لك يالله روح من هون بقا روح .. شو بدي أعمل انا يعني ..

نصار : بحبك يا لطفية بحبك .. .. بس بدي أعرف هادا أخوكي شو بدو مني ايه ما بخلي حدا غيري ياخدك لو تطبق السما على الأرض

لطفية : لك يوووه .. يا فضيحتي لك ليكو أخي شوكت جاية من راس الحارة مع المختار أبو فهمي .. يالله ولك نصار امشي من هون أمشي..

نصاار : (وهوعم يصرخ بأعلى صوتو ) ايه خليه يشوفني .. وخليه يواجهني أخوكي هلي عاملي حالو رجال ... وينو .. لك وينووووووووووو .. اتركوني عليه ... ولك تركوني عليه

لطفية : ولك يا اجدب وطي صوتك .. بدك اخي يموتني

نصار : اي فشر يلمس شعرة من شعراتك الحرير وانا هون :10:.. لك لطوفتي ارحميني بوسة بس بوسة

لطفية رح تدوب من الخجل :10: :يووووه نصار بلاه هالحكي :10: .. ولك انئلع من هون تضرب :10:.. الليلة تعا جنب شباك غرفتي و منحكي شوي

نصار : لك دخيييييييييييييييييييييييييييلو انا دخيلو الخجلان ريتو يؤبرني و يطلع ع ئبري بالكعب العالي .. ابوس روحووووووووو انا

شوكت من بعيد : ولك نصار يا ( @$^%$^% ) - مسبة مشفرة - شو عم تعمل حد البيت

و فززززززززززززززز بيهرب نصار ( الهريبة تلتين المرجلة ) :19:

و لطفية شو رح يصير فيها يا ترى

يتبع.. ​

 

[جمانة]

نصار فز و هرب و لطفية واقفة ع الباب عم تندب حظها لانو شوكت شافها معو

لطفية: لك الله لا يوجهلك الخير يا نصار

و تفز ركد لغرفتها و تقفل عليها الباب

شوكت فات ع البيت و هو معصب و عم يجعر بأعلى صوتو

شوكت : لطفية .. ولك لطفية وجع الهي .. افتحي الباب احسن ما اكسرو فوق راسك

ام لطفية : شوفي يامو شبك عم تصرخ يا بعدي..؟؟!!

شوكت : لك يامو بنتك بدا توطي راسنا بالارض .. لك انا شوكت دراعو اليمين للعكيد ابو العز ودراعو الشمال للمختار ابو فهمي ...لاقي اختي واقفة ع الباب مع نصار .. نصار ولك لطفية نصار .. آاااااااااااخ بس آااااااااااخ

ام لطفية : صحيح هالحكي ولك لطوف .. لك ريتني ائبرك الهي ..افتحي الباب يا شرشوحة افتحيه

لطفية عم تبكي و تتمسكن : لك يامو والله ما ساويت شي .. نصار كان عم يسأل عن ابي بس .. صدقيني ما عملت شي ..

شوكت : ولك لطوف مفكرتيني اجدب ما عم شوفك كيف بتطلعي عليه .. العما بعيونو العما .. انا بفرجيه لهالـ ( #$%#^$@# ) - سبة مشفرة -

لطفية : دخيلك يامو دخيلك احكيلو ما يعمل شي بنصار .. والله الزلمة اكابر وما عمل معي شي :10:

أم لطفية : اكابر قلتيلي ما .. اي الله لا يوجهلك الخير على هيك عملة

الام و هي عم تخاطب شوكت ابنها المدلل : لك خلص يا ابني خلص بئا مو ناقصين وجع راس .. تعا تؤبشني حطلك لقمة تاكلها

شوكت : نفدتي هالمرة يا مقصوفة الرقبة .. بس انا بعرف كيف ربيه لنصار .. ما رح اتركو يهرب من ايدي .. رح قطعو شئفة شئفة .. وما بكون شوكت على سن و رمح ازا ما عملت هيك

لطفية عم تحكي حالها : اي روح يا .. تضرب بشكلك .. عاملي فيها ابضاي وانت بس تشوف زهرية بتصير اد الصوص :19:

و بفوتت ابو شوكت ع البيت

يتبع... ​

 

[جمانة]

ابو شوكت فات ع البيت و لطفية راحت غرفتها و سكرت على حالها الباب و شوكت عم يتوعدلا انو يموتها

ام شوكت : اجيت يا تؤبر قلبي .. نورت أرض الدار ابن عمي :10:

ابو شوكت : الله يرضى عليكي الهي ..

ام شوكت : حطلك لقمة تاكلها تؤبش قلبي

ابو شوكت : اي حطيلنا شي ناكلو و بطريقك ناديلي لطفية عندي ياها جوز كلام

ام شوكت : امرك يا عمري :10:

ام شوكت راحت تحط الغدا

لطوف قاعدة بغرفتها وماسكة هالموبايل و عم تبعت مسجات

توت توت توت توت .. صوت كبس ازرار الموبايل :19:

لطوف عم تبعت مسج لنصار :10 يا عيني ع الحب )

نصار يا تؤبر قلبي
هيك بتعمل فيي لك يا اجدب
ما بتخاف عليي حبيبي
شوكت كان رح يموتني



و توت بتبعت المسج
بعد ثواني بيوصل الرد
توت توت .. توت توت ..

لطفية يا روحي
و يا بلسم جروحي
يا بعد شواربو لنصار
لك فشر شوكت يلمسك و راسي عم يشم الهوا
انطريني اليوم جنب شباك الغرفة
محضرلك قصيدة بتشل



لطفية : ولي على قلبي .. قصيدة .. لك تؤبر قلبي انت و حكياتك شو ظراف:10: .. انا ازا ما اخدتك يا نصار رح انتحر .. رح اشرب كاز

و بينما لطفية عايشة بالاحلام و الاوهام .. بتسمع صوت امها عم تناديها

ام شوكت : ولي لطفية .. بشو سرحانة يا مقصوفة الرقبة اه .. بشو عم تفكري ؟؟؟ قومي اتلحلحي اوام ابوكي بدو ياكي :80:

لطفية بينها وبين حالها : ( العمى ممنوع نفكر كمان بهالبيت و شو بدو هاد كمان .. الله يستر ما يكون شوكت حكالو عن نصار ).. لا يامو ما في شي .. ليكني جاية :80:

ابو شوكت عم يحاكي لطفية : شو يا بنتي سمعت قال جاييكي خطابين اليوم

لطفية : اي يابي ابو الروض اخوه للمختار ابو فهمي :80:

ابو شوكت : اي وانا عطيت كلمة للجماعة و ان شاء الله كتب الكتاب الخميس الجاي

لطفية نطو عنوناتها لبرا : شــــ شـــ شــــووووووووووووووو

ابو شوكت : ولي عم تعلي صوتك بوشي

لطفية : لا ما قصدي يابي .. بس انا .. انا .. انا ما بدي ابو الروض ما بدي ياه ..

ابو شوكت : شو ع كيفك ما بدك ياه .. هاد اخر كلام عندي ما عجبك تصطفلي

لطفية عم تبكي و تندب حظها و حبها لنصار .. يا ترى شو رح يصير

يتبع ​

 

[جمانة]

ام شوكت اجت لابو شوكت و هي متزورة منو و من الحكي يلي حكاه مع لطوف :80:

لانو هي بدا تجوز بنتا للعكيد :10: و ابو شوكت بدو لطوف لابو الروض :19:
ام شوكت : لك يا بعدي يا تؤبرني ليش هيك حاكيت لطفية .. اي والله والله ما بزوزها ابو الروض

ابو شوكت : ليك على هالسيرة .. لك انا لما بحكي كلمة الكل بيسمعلي فهمانة ولك .. لطفية رح تاخد ابو الروض يعني راح تاخدو

ام شوكت : لك ابن عمي ..

ابو شوكت بيقاطعها : و بتردي بوشي يا مرة .. ولا كلمة سمعانة ولا كلمة

و بلش مسلسل النكد و الصريخ ببيت لطوف بعد مسلسل الضحك و الهبل

لطفية بتبكي بغرفتها و ناطرة ضو القمر يطلع لحتى يجي نصار و تشوفو

بهالاثناء شوكت يلي عامل حالو ابضاي فات ع غرفتو و لقى هناك مرتو زهرية ناطرتو

شوكت : لك تؤبشي قلبي زهورتي كيفك يا قمر :10:

زهرية : جيت يا مقصوف الرقبة .. وينك لهلأ اه وينك .. لك وين صايع بنص الحارة

شوكت : لك شبكي بنت عمي روئي عليي

زهرية : لك تعمى عينك الهي .. انا بدي افهم بس شو يلي مصبرني عليك ما بعرف .. و عاملي فيها ابضاي و رجال و عم تصرخ على اختك كمان :19:اي روح من خلقتي ياه .. الئرف يئرفك انت و هيك عيشة :80:

و شوكت اد الصوص بين رجلينها :19: بيطلب منها السماح لانو اتأخر ع البيت

يتبع .. ​

 

[جمانة]

و تحت أصوات خنائ زهرية و شوكت
و دموع لطفية
و خطط ام شوكت لتزوز لطوف للعكيد يلي شنباتو من اول الحارة لآخرها
و ابو شوكت يلي مصمم انو يزوز لطوف الحلوة الامورة لابو الروض
الاوضاع هديت شوي و وصلنا للاكشن


لطفية بغرفتها عم تطل من الشباك ناطرة حب حياتها الاول و الاخير :10:
قصدي العشرطعش و الاخير ازا الله راد
نصار راكب ع الطرطيرة و عم يسوقها بأقصى سرعة ليوصل لحبيبة القلب
و حامل معو قصيدة كاتبها
و هو عم يحلف و يتوعد لشوكت بئتلة عمرو ما رح ينساها
بينما هو بالطريق و از بـ


عايشة وحدا بلاك وبلا حبك يا ولد
حاجة تحكي عن هواك ضحكت عليك البلد :19:


هي النغمة تبع جوال نصار


مين عم يدق لنصار
خيرية


لك خيرية ما غيرها


حب نصار الاول
يلي قطعتلو كرت مشان ابو الشود مفتول العضلات
نصار قلبو ما طاوعو ما يرد عليها
وقف الطرطيرة ع جنب
و رد
نصار و هو يشعر بقليل من الارتباك لانو صرلو شي اسبوعين ما حكا خيرية من لما تخانئو اخر مرة: علووووو ( الو بس لانو شب بيحكيها هيك ) حمش يؤبر لطوف :10: ..


خيرية بكل دلال و غنج : الووووووووووو نسووورتي :10: .. بونسوار كيفااااك يا تؤبرني ​

نصار: ( العما بقلبها عم تتغزل فيي .. لك آااااااااااااخ هلأ جاية لما صار قلبي للطفية ) اهلين خيرية :80: .. خير شو بدك .. مو شايفة اديش الساعة


خيرية : يوه على هالسمعة .. هيك بتحكي معي لك تؤبرني .. او البنت لطفية خلتك تنسى الايام الحلوة يلي بيناتنا :80:


نصار بكل رجولة عم يزعق على خيرية : ولك خيرية رقمي بتنسيه سمعانة .. و اسم لطوف ما بتجبيه ع لسانك عم تفهميني .. و ازا شفتو مرة تانية بموبايلي رح تشوفي شي ما يعجبك


لك يؤبشنييييييييييييييييييييييييي الرجال المخلص انا :10:

​

و طج توت توت توت


نصار سكر الخط بوش خيرية و قلبو عم ينده حبو لطوف ..


ركب ع الطرطيرة و كمل مسيرتو نحو الهدف المنشود
الا وهو منزل لطوف


لطوف وائفة ع الشباك
و صفانة وهي عم تسمع انغام الست :10:
هيفا وهبي :19:


رجب حوش صاحبك عني
رجب صاحبك جنني


و عم تضحك : هي هي هي .. لك ايييييييييه على ايامك يا رجب
حتى هيفا غنت عنك :19:
تؤبشني لساتني بتزكرك وبتزكر عنونك الحولة :10:
لك لطوف فيئي العما هلأ نصار جاي .. :80:


و وصل نصار لعند حبيبة القلب و البنكرياس
و ......


يتبع



​

 

[جمانة]

و اخيرا التأم شمل الاحباب :10:

نصار شوي شوي عم يئرب لعند لطفية

و لطفية قلبها عم يرقص رقص كلما حست انو صوت طرطيرة نصار عم يزيد و يقرب لعندا

لطفية : نصار .. يا بعد روح لطوف :10:.. لك ريتك تشكل آسي إلهي .. بس شوفك بنسى كل المعجبين الماضيين .. وما بفكر الا فيك

نصار : لطوفتي يا بعد طرطيرتو لنصار انتي :19:.. لك تؤبشيني اي :10: .. ريتني روح فرم ودعس إلهي

وصل نصار لعند لطفية
و طبعا لطوف ما خلت طحين ما حطتو على وشها :19: .. وما خلت اي شادو ما استعملتو :10:
و الخدود يخزي العين .. عاملتهم بوتكس ​

و الشفايف حاطة عليون جلوس بنفخون
لانها مرة شافت نصار عم يسمع نانسي
فقالت اكيد بيسمعها لانو بيحب شفايفها و خدودها :19:
لهيك كان لازم تلجأ لبعض طرء التنفيخ
مشان ما تخسر حبيب القلب و الكبد :10:​

نصار : لك آااااااااااااااااااااااخ .. قليلي لك لطوف .. احكيلي .. مين فيه يشوف هالجمال وما يجن اه ؟؟ :10:

وبلش يغني بصوتو الشجي
يعني لطفية حست صوتو كأنو صوت كلب عم يعوي بس خشلت تحكيلو :19:
واشجانا نصار بأطرب الالحان

و شو عملتي فيي يا با يا با
يا هالصبية يا با يا با
قلبي و عينيي والله يا با
دابو بجمالك
و نظرات عنونك دبحوني
ما بنام الليل جن جنوني
شو اعمل حتى لائيكي
حدي على توووووووووووووووول





لطفية : يوووووووووووووه نصار كن بئا :10:.. حاج تخجلني .. ولك حاج تغني هلأ بتفيئ اهل الحارة

نصار : لك ايه يفيئو .. يفيئو يا لطفية يفيئو ..شنو انا ما عاد فيني خبي الحب يلي عم يحرئني .. هيك حاسو عم يتغلغل جوات جوات صمصوم قلبي .. :10:

لطفية عم تزيح بنظراتا و ترفع عيونا لفوء بحركة تخلي نصار يدوب بمكانو ​

لانها كانت حاطة هديك الكحلة و الرموش يلي طولها اد رموش الطاووس
و نصار المسكين مفكر انو رموشها طبيعيين :19:​

اي ما علينا :80:

لطفية : يوووووو تتحورء الهي :10:.. عم قلك كن بئا لك نصورتي .. هلأ بيفيئ شوكت و ما بيخلينا نتهنى بليلتنا

نصار : ولي ولي ولي ولي .. ولي على ئلبي انا اي .. لك ولي على بعضي و على تولي وعلى كل عظمة فيي .. لك شو هالصوت شو هالابتسامة.. طوشتيني جننتني بهدلتيني .. صرت امشي بالشارع و شعري منكوش و ريحتي لنص الحارة :19:.. كلو من حبك يلي مجنني .. يلي مالكني :10:

و بلش نصار يسترسل بالغزل و لطوف وشها انقلب بندورة :10:

و فجأة تزكرت كلام ابوها و كلام امها كل واحد منون بدو يزوزها حدا
اغرورقت عينا لطوف بالدموع ..

نصار شاف عنونات لطفية عم يلمعو
دبت فيه النخوة و الرجولة العربية

نصار عم يحكي مع حالو لطوفتي عم تبكي ).. ما عاش يلي بدو يبكيكي يا ملاكي انتي

لطوف : نصار .. اهلي بدون يزوزوني .. امي بدا تزوزني للعكيد :10:.. وابي بدو يزوزني لابو الروض

نصار : لك فشر حدا يتزوزك وراسي عم يشم الهوا .. عم تفهميني لك لطفية .. انا رح اشحد الجيوش وحارب الحارة كلها كرمال هالعيون الخضر
لك لطوفتي مو مبارح عيونك كانو زرق؟؟!!
دخيلو انا يلي لون عيونو بيتغير على لون تيابو :19:
دخيل الله يلي خلئك اي

لطفية انحرجت شوي :19: بس ما كانت بتعرف انو نصار هالاد اجدب وما رح يكتشف انون عدسات ...

يتبع ....
​

 

[جمانة]

ويستمر اللقاء بين العاشق و المعشوق :10:
بين نصار ولطفية يعني ..
و التنين غرقانين بحب بعضون و عم يتبادلو نظرات الغزل و الشوق

نصار: لطووفتي .. يا عمري انتي :10:

لطفية : اؤمرني تؤبشني

نصار : دخيل هالصوت .. حبيبتي اسمعي كتبتلك شعر ​

​

لطفية : ولي على قلبي شعر كمان :10: .. سمعني يا تؤبرني .. بدي اسمعو بصوتك يلي بيدوخني

نصار : اااااااااااخ يا لطفية ولك آاااااااااااخ
ان القلب في حبك دايب :10:
و العين من عشقك عم تبكي دم
يا لطفية يا حرامية
سرقتي قلبي و مهجبتي :10:
فصرت متل المجانين
عم اركد بالشارع و شعري منكوش
اعم احفي :19:
لك عم انسا البس شحاطي :80:
وعم نام الليل بالبرد لانو حبك بيدفيني ​

لطفية بينها وبين حالها : مفكرلي حالك نزار قباني اي ولا كلمة راكبة على بعضا ​

​

نصار : لطوفتي وين سرحتي مو عاجبك الشعر

لطفية : قال مو عاجبني قال .. لك بيجنن تؤبرني بيجنن

نصار : تؤبشيني الهي :10: ريتك تمشي على رمشي وتهدي على خدي ​

​

لطفية : العما شو امشي ع رمشك هي شو شايفني قملة

نصار : ولك لطوووووووووووووووف لا تدبحيني .. ولي عليكي شو لزوزة بس تعصبي دخيل هالخدود التفاح :10:
​

وبينما هالتنين على هالحالة بيفيئ شوكت من النوم وبيسمع صوت جاي من غرفة اختو ​

شوكت : زهرية .. ولك زهرية .. فيئي تضربي انتي وهيك نومة

زهرية : شو في لك شوكت مو شايفني نايمة هففففف منك

شوكت :ولك مو سامعة يلي سامعتو .. لطوف الله لا يوجهلا الخير .. هاتي الفرد هاتي .. بدي قوصها واخلص منها ​

​

زهرية : ولك روء ابن عمي ولـ ,,,,,,

شوكت : حلي عني اتركيني انا بفرجيها بدي اغسل شرفنا بدمها
​

شوكت بيطلع من غرفتو وهو معصب وبيروح لغرفة لطفية و بيدفش الباب

شوكت : لطووووووووووووف ​

لطفية : ولي على قلبي شوكت .. لك اهرب نصار اهرب

نصار ما صدق على حالو وفز هرب :19:
وهو عم يصرخ ويقول : لطفية رح اخطبك لا تخافي :10:

شوكت ما تحمل المنظر ولحق ورا نصار و قوصو بالفرد
بس نصار البطل لو قوصوه ميت مرة ولا طلقة رح تجي فيه :19:
بتعرفو يعني لزوم الاكشن :80:​

و لطفية

يا حوينتك يا لطووووووووووووووووووووووووووف

يتبع ... ​

 

[Cosette]

:19::19::19::19:
كملي كملي
بزمتي انك مو طبيعية
:19::19::19:

 

[سِدْرَة المُنتَهَى]

لطوووووووووف ..اشتقتلها أنا :10:
يلا يلا هاتي الجديد :10:​

 

[جمانة]

تؤبشو قلبي الهي :10:
ان شاء الله الليلة بنزل الجزء الجديد :10:
لعيونكم :10:​

 

[CoOoL CaAaT]

يا يامو شو هاللطوف هي
كملي كملي جوجو
تؤبشيني انتي وفكوراتك :10:
الئصة بتجنن
بس شو مشان عكيد ومختار ... وموبايل ؟؟ ​

 

[جمانة]

عصر التطور حبيبتي :19:
ان شاء الله بكملها اليوم ​