بلشنا بالحب الشامي اللي آتل حالوووو

[روح الشام]

اسمعوا هل الخبرية من شان التنويع لح نعمل واحد عن اليم يم يم " يعني عن الأكل وواحد عن أرض الواقع " يعني البيت الشامي " ​

لأنو يا تقبروني نحنا بنحب اللت والأكل ..​

هه​

فحنعمل فيفتي فيفتي ​

مبارح كان الحكي عن الحلو ... واليوم لح يكون عن الأوصاف والصفات والغزل الشامي الدابح حالو ​

لأنو الشامي إن حب شي وحدة مثلاً بيئبرا حكي حلو ... ​

من شان هيك التلطيش بيكون على أبو موزة بالشوارع .. وأخصّيتن إذا مرقتلا شي وحدة على وشَّا ضو ...​

يعني نحنا شعب حبّيب .. بيحب وابينحب ..​

والأريضة بجد بنات الشام فيهن حلاوة مميزة يعني ​

لولااااااااا ​

هل الستميت علة ..يلي فيهن ​

لكانو غير شكل ..​

ه​

لح نبدا بصفات الصبايا إذا الواحد سألو شو رأيك بفلانة ... ؟؟؟​

لأنو النسوان أليل ليمدحو بعضن إدَّام بعض ​

آل بيغااااااااااااااااااااااااارو​

أو وقت الحماية توصف العروس للعريس ...​

طبعاً هاد رأيها بالكنّة أبل ما تصير عندها .. أمَّا وقت يوأع الفاس بالرَّاس ..​

هه​

بتورجيها نجوم الضهر .... عزِّ العصر ...​

اسمعوا ..شو بيؤلوا .... لح نبدا بوصف الحماية للكنة أبل وبعد ما تصير عندا .... آل ..​

مجذبة.. يعني جمال غريب مع تناسق في ترتيب الواجهة يعني الفيس تبعها فيّو جاذب مو شرط توافر مقاييس الجمال ..​

لأنو في كتير حلوات بس جمالهن جامد ​

مثال .. بنات أبو عصام .. بباب الحارة ..​

وحدة فيها جمال ووحدة فيها جاذب ​

​

​

غلاّية.. يعني أقرب لأنو تتاكل من كتر مالها عم تغلي حلاوة وجاذبية .. وبتنقال على الحِرْكة أكتر​

من السَّهيانة ..​

خفيفة بتنآل للمرا الحِرْكة​

كربوجة : يعني حلوة وظريفة​

عجعوجة : يعني سمينة شوي ومعجعجة​

آمتها متل الحور ... وعيونها متل مرت التور ..​

تصّورا آل هاد مدح للطول وجمال العيون ..​

إي والله والله لإحرد ما حدا يقول هيك عني .. مثلاً ..​

هه

ما لك علي يمين إنّا بتطيّر ضبنات الأعل ..​

أي دونحلفان ... من عزم الصدق آل يعني ..​

هه


​

وليعلى عيونا شو حلوة لك بتمزع الأعل ​

يعني ومن الحب ما أتل ... بتدعي عليها من كتر ما ​

حبّتا آل يعني ..​

شالوحة : المرأةالفارعةالطول يعني محورأة ..​

والله ما بعرف بس شكلها مسبّة .. ليس بتنآل للوصف ما بعرف ..؟؟؟​

ه


​

مكحّلة.. طبعاً كحل رباني ... بس هلأ يا حرام الكل صار مكحَّل ربَّاني ..​

هه من شان هيك مابأا انآلت كما كانوا يعنوها ..​

​

غنجة : وتصحب في أغلب الحالات البدينات ​

لأنهن بالعادة دمَّاتن خفاف ليش ما بعرف ؟؟؟​

دلّوعة : كل الصبايا صاروا بهل العادة ​

بس في دلع مع أدب ..​

وفي دلع مع مياعة ...​

" دلُّوعة ماما "..... " دلّوع ماما "​

وصارت تنآل للشباب أكتر بهل الأيام الله يجيرنا من الجاية ...؟؟؟​

​

ملفوفة.. ممتلئة الجسد دون بدانة...​

بالنسبة للحماية المربربة أحلى .. وبالنسبة لشباب هل الأيام السحنوكة أحلى ..​

​

امبَودَرة.. بيضاء وخدودهاحمر... يعني مكياجا ربَّاني ...​

وهه كمان يا حرام فالكل هل الأيام بودرتن ربَّانية ​

​

متكلّمة.. يعني حديثها حلو.. وبتنآل عن المثقفة الفهمانة ويلي آخدة السَّرْتَفيكا .. ولو كانت ابتدائية مثلاً ..​

​

مقدَّرة.. للكبارية أكتر من الصبايا​

​

أكابرية.. بتسمعها بالحفلات أكتر الشي ​

أكابرية # مشرشحة ​

​

كتفها راتب..

كتفها أكابري..​

التنتين نفس الشي ... يعني تيابها حفر وتنزيل عليها ...​

ولا بئتِلها ..​

​

منطقها حلو.. ملفظكلامها ...يعني ملافظها ملافظ سعد ... وبيؤولوا ريئها حلو ...​

​

راكزة.. تقيلة ومو طرطوعة .. يعني حركاتها موزونة​

مأرأزة : يعني مو ثابتة .. وأخصّيتن إذا لابسة كعب عشرين سانتي .. لأنو أصيرة ..​

وعم تتمختر إدّأم النسوان .. ​

" حلوة بس مأرأزة "


​

​

اموجَّبة.. صاحبة واجب... يعني بتفهم بالأصول ..​

وهي صفة كتييييييير مهمة ​

​

امْتَأّنة ..تتقن الأشياء، يعني بتساويها على مهلة وشوي شوي .. مو شَبئ​

وهي كلمة أمي وستي على طول الله يزكرهن بالخير ..​

وأخصّيتن بالجلي ومساوات البيت والتعزيل ​

مرتّبة ... نفس المعنى ..​

​

لهلوبة.. نشيطة الحركة... يعني حِرْكة مو نايطة أو نعيانة ..​

نغشة.. خفيفة دم ودلوعة،​

ونغشة .. منأهم صفات البنت الشامية​

سويعاتية.. متبدلةالمزاج... وكل شي إلاّ إنّا تنئرئ ..​

مشكلة ... ؟؟؟​

​

فهيمة.. كتيييييييييييييييييييير​

هه​

​

مقوننة.. شديدة الترتيب حد الوسواس ... يعني أأرب للمرض ..​

من كل شي ابتتوَنْون ..​

موسوسة : مهووسة بشغلهمعيّنة .. وعلى الأغلب هَي صفة الحموات مو الكناني ..


​

​

فالحة.. شاطرة.... وهي أكتر كلمة بتنآل .. حتى ولو كانت بنيّة المسخرة ..​

إي لأ فالحة ... شو بدكن بهل الحكي ..​

هاد نموذج صغير ... وهلأ بشكل صغير كمانة ..​

كيف بيغازل الشامي؟​

تؤبشي عضامي.. ​

​

بعدي رب هالعين... ​

​

ان شاء الله ما يبلى ولايتخ ..​

إنتي إرع عيني.. يعني عرق عيني..​

مو بس حلوة.. بتقول للقمر قوملأقعد مطرحك​

إيه ما تبلا هل الملافظ ​

​

الآلب غالب .....​

تشكلي آسي ​

تؤبشيني أبشوتدفشيني دفش : مزحة


​

تجيكي دفشة ترميكي عليي : دعوة مأعولة​

​

لك بدي العالم يشتلئ أديش بحبك :ينتبهإلى أمر مخفي


​

إنشا الله مجاري الهنا..​

طبعاً واردة كتييييييييييييير تكون شي مسبة في صدر الكلام وبعدين يرتيها بشي كلمة حلوة ..​

فهيك بيضرب عصفورين بحجر واحد ​

يبعتلك حمة ... شو حلوة ..​

ولي على آمتك شو مهضومة ..​

تروحي أتل شو بحبك ..​

ومن هل الحكي ............... ​

وماااااااااااااااااااأكتروووووووووو​

وخود بأا ... ​

هل هوِّ سب .. أم غزل .. ما لح يبيِّن معك ...​

بنووووووووووب ..​

بتبقى الكلمات بالنّيات ...

​

 

[فادي]

مشكووووووووووووووووووووووووورة روح الشام ما شاء الله معلوماتك شاملة الله يخليك لامك

نغشة.. خفيفة دم ودلوعة،​

ونغشة .. منأهم صفات البنت الشامية​

احلى شي هي

 

[حربوء]

شكراً كتير

كلام جميل وحلو كتير ​

 

[روح الشام]

ويخليلك غنوجة فدووووو


منورين شباب ​

 

[غنوجة بيا]

كتير مهضومين

ميرسي يائمر

 

[ĻàĎỷ iЙ ŖẼD]

لك كتيييييييييييييييييييييييير روعة لك انتي شو
بتطلعيلي بكل موضوع ولا التاني شي بيجنن
​

 

[روح الشام]

:10::10::10:

لك تؤبري قلبي نيروو :10:


منورين صبايا :10:

 

[زهرة النرجس]

 

[حسام الحلبي]

يعطيكي العافية روح الشام​

 

[روح الشام]

تؤبشيني انتي وورداتك منورة حبيبتي​

يعطيكي العافية روح الشام​

الله يعافيك حسامو​

 

[GaZoOoooL]

نغشة.. خفيفة دم ودلوعة،




ونغشة .. منأهم صفات البنت الشامية:10::10::10:

​

 

[Pure Feelings]

تروح اتل شو انك نغشة

:19::19::19:

كتير حلووو :10::10::10:

 

[CARLOS]

ماشاالله عليكي ماخليتي شي
يعطيكي العافية روح الشام
موضوعك كتير حلو

 

[روح الشام]

لك لكن كارلوووس بعجبك

هه

منورين

 

[Bilal Mohammad]

​

 

[بكتب عخد الليلات]

ايه شو هالحكي الحلو
شي مرتب

لك والله البنت الشامية على راسي من فوق


​

 

[KiNg of Pc]

ايه والله صحيح

​

 

[ساحره البشر]

اي والله

 

[روح الشام]

تسلمووولي

منورين شباب وصبايا