زلاغيط شامية لزيزه

[The Hero]

مرحبا :10:



أوها ياخوخ بغبارو
أوها ويا ورد بزرارو
أوها واللي مابيحبك ياعريس
أوها لتنخرب ديارو
وللللللييييييييييييييش

اوها وساوينا مجدرة
أوها وطلعت مدردرة
أوها واللي مابيحبك ياعريس
أوها يقعد بسفل الطنجرة
ولللللييييييييييش

أوها صلوا عالنبي
أوها وزيدو صلاتو
أوها واللي مابيصلي عالنبي
أوها تطق مرارتو
وللللللللييييييييش

أوها وكسرنا بيضة
أوها وطلعت بصفارين
أوها وكل الناس بفرحه
أوها ونحنا بفرحتين
ولللللللللليييييييييييش

أوها في ببيتنا نجاصة
أوها حلوة ورقاصة
أوها واللي شاف عروستنا وماصلى عالنبي
أوها تفوت بقلبو رصاصة
للللللليييييييش

أوها ياصحن مجدرة
أوها ومجلل بالكزبرة
أوها وعروستنا حلوة
أوها ومابدها غندرة
ولللللللليييييييييش

أوها يا مشمش كلابي
أوها وبالقلب بشابي
أوها واللي مافرح بالعروس والعريس
أوها يجي داء السردابي
وللللللليييييييييييش

أوها الدهب بقفاصو
أوها والألماس بجراصو
أوها واللي بياخد من بناتنا
أوها بيمشي وبيرفع راسو
وللللللللللييييييييش

أوها طبخنا مجدرة
أوها وجللناها بالبصل
أوها واللي مابيحبنا
أوها على بيتو مابيصل
ولللللللللييييييييييش

أوها بناتنا مخباية
أوها ورجالنا مرباية
أوها وجهازنا عالموضة
أوها سجاده ومرايه
وللللييييييييش

أوها وطبخنا لبنية
أوها ومحشيه بالشراطيط
أوها ومامعي نقوط نقطك
أوها رح نقطك بالزلاغيط
ولللليييييييييييييييييش

أوها تشي بشي
أوها وطبخنا محشي
أوها نحنا بيت فلان
أوها وبيلبقلنا كل شي
ولللللللللييييييييييش

أوها يا صحن رز بحليب
أوها كل مابرد بيطيب
أوها وكلنا أهليه
أوها ومافي حدا غريب
ولللللللليييييييييييييش




:10::10:
:10:


​

 

[زهرة النرجس]

عقبال ما يحكوهم كلهم بعرسك

 

[The Hero]

وصلتي
شكرا على مرورك

 

[حارة الضبع]

عقبال ما يحكوهم بعرسي و عرسك​

 

[القيصر]

إنشالله بعرسك وبعرس الجميع الشباب الطيبة والصبايا بيحكوهن





abo bilal you my love​

 

[The Hero]

أحلى أبو بلال والله ملك
​

 

[ليليان]

يسلموا كتير عالزلاغيط
كتير حلوين وعئبال
ما بغنوها بعرسك
وعرس كل شخص بتحبو
ليليان​

 

[PliiiJl JljJj]

حلوين

 

[المستبده]

كتيييييييير حلوين

يسلمووووو ايديك هيرو​

 

[ღRosa Blancaღ]

أوها في ببيتنا نجاصة
أوها حلوة ورقاصة
أوها واللي شاف عروستنا وماصلى عالنبي
أوها تفوت بقلبو رصاصة
للللللليييييييش

يلا بعد فترة قلولي ياهن اي بس بربي خايفة

 

[نبيل 73]

والله انا لابحب المهاهايي ولا العتابا ولا الميجنا ولا الدلعونا ولا الهوارة ولا حتى المواويل انا ياعمي بحب فيروز وبس وبس