مــنــــبــــــــر الــــبــيــلـــســـــــــــــان

[الحرالباكي]

متايع ..........
​

 

[المستشـــار]

تلخيص موضوع الزواج كاملا

التلخيص الكامل لموضوع الزواج


أولا : فيما يخص تيسير الزواج

1- تخفيف المهور وهاد الحكي بخص جميع الوطن العربي .. يمكن عنا بالشام أحسن شي بقصة المهور وتسجيله غير مقبوض بس بالخليج عم يموتوا من هالقصة .

2- أنو الأهل لازم يرضوا بالسكن مع أهل الزوج مؤقتا وبحط تحت مؤقتا مية خط .. أو بيت بالإيجار
لأنو مستحيل الشب بأول حياتو يشتري بيت عدا حالات نادرة


3- النقطة التالتة كتير حلو يلي أشار عليه أخي الدمشقي أنو الأهل جميعا يساعدوا أبناء العيلة فكرة كتير واردة


4- وفي نقطة يلي حكاها أخي فالكانو بالفعل مزبوطة والله الدولة كمان لازم تساعد هالشباب بقصة السكن يعني هنن عم يحاولوا الله يجزيون الخير بس بدنا محاولات أكبر وأتر بكتير



ثانيا : فيما يخص التعداد

بنقطة واحدة : جواز التعداد شرعا مع مراعاة العدل المطلوب وتوضيح العدل المذكور بالآيات .. بغض النظر عن رأي أي شخص هو حر برأيو سواء بدو يعدد أو لأ ... بس المفروض ما نلوم يلي بعدد وما نصفو بصفات متل (( نسونجي )) و(( زير نساء )) ونحوها ... لأن الرسول صلى الله عليه وسلم كان معدد وبعضا من الصحابة والتابعين وغيرهم ... وأنا شخصيا رأي ما بعدد ان شاء الله بس ما بلوم غيري عليه لأنو هي حريتو الشخصية وهي جائزتلو شرعا وأنا ما بحرم الحلال ووضحنا كل ما يتعلق بهالنقطة


ثالثا : بالنسبة للعمر

النقطة الأولى : اتفقنا على أنو السن المناسب للزواج للرجل من 25 لل 33 ( متى ما استطاع البائة ) وهي غالبا في هذا السن وللمرأة من 18 بعد البكالوريا (ويحبذ تكمل جامعة عند جوزها لنمو ثقافتها ولكي تطور من أبنائها ولكي تملك صنعة باليد متى ما احتاجتها )
إلى ال25 ( متى ما اجا النصيب ) ... وهناك استثناءات كثيرة بسن الزواج ان كان أصغر أو أكبر سواء شخص مسافر لبرا أو شخص ما عندو عسكرية ووضعو المادي والعقلي (( رشيد العقل .. قد المسؤولية يعني )) ممكن يستنثى

فقد قال عليه الصلاة والسلام «يَا مَعْشَرَ الشَّبَابِ مَنِ اسْتَطَاعَ مِنْكُمُ البَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ، وَأَحْصَنُ لِلْفَرجِ، وَمَنْ لَمْ يَسْتَطِيعْ فَعَلَيْهِ بِالصَّوْمِ، فَإِنَّهُ لَهُ وَجَاءٌ». رواه البخاري ومسلم .

النقطة الثانية : أنو يكون الفرق بين الزوجين حسب رأي الأغلبية يكون من 5 - 10 سنوات بالوضع الطبيعي .. وفي حالات استثنائية كمان لا يخلو الأمر وبكون الزواج مافي أحلى من هيك والحمدلله .. بس الكلام عام يعني عم نحكي المثالي بوجهة نظر الأغلبية


رابعا : بالنسبة للأولاد

نقطة وحدة أنو المفروض نجيب ولاد نربيهون تربية صالحة مو نلحشون هون وهون لازم يفيدوا الأمة والوطن والمجتمع

وطبعا الهداية مو بإيد الفرد إنما بإيد رب العالمين .. قال تعالى (( إنك لا تهدي من أحببت ولكن الله يهدي من يشاء )) بس الواحد بيعمل يلي عليه

وحديث عن النقطة كلها بشكل عام .. قال عليه الصلاة والسلام

(( تزوجوا الودود الولود فإني مباه بكم الأمم يوم القيامة ))


خامسا وأخيرا فيما يخص هذا الباب

الخيانة الزوجية

واتفقنا على أن الخيانة الزوجية هي خيانة سواءا من طرف الرجل أو من طرف المرأة وهي مرفوضة من الطرفين بالدين والعقل وبالأخلاق

ولكن بالمجتمع تكون خيانة الرجل مغفورة مع العلم أنو المرأة لا تنسى ولكن تغفر الله يحفظ بناتنا ونسائنا جميعا ..
ولا تغتفر خيانة المرأة باتفاق الجميع .. ولكن الله غفور رحيم وان ثبتت توبتها فيجب أن نسامحها لأنها بشر بالنهاية



بتمنى يكون تلخيصي جيد وعجبكون وبتمنى اذا في خطأ تناقشوني فيه وشكرا
ودمتم بكل ود وبشكر كل مين ساهم وناقش بهذا الحوار وبهذا الملف ... وبعرف تعبنا ولكن والحمدلله توصلنا لنتيجة واستفدنا وناقشنا وعبرنا عن مشاعرنا وكل ما يهمنا بهالموضوع .. وبتمنى يطبق كل شي حكيناه من حلول لمشاكلنا ومن آراء بناءة

جزاكم الله ألف ألف خير على المجهود الجميل وعلى آرائكم الرائعة والمفيدة وعلى الحلول المطروحة وعلى كل شي صار


وغدا ان شاء الله أو بعد غد سيتم طرح الموضوع الجديد

 

[قيــ الروح ــثارة]

يا عيني بيجنن هالتلخيص شامل ووافي
ميرسي الك

بس ممكن أعرف شو يعني باءة ​

 

[المستشـــار]

المراد بالباءة :
اختلف العلماء في المراد بالباءة هنا على قولين يرجعان إلى معنى واحد أصحهما أن المراد معناها اللغوي وهو الجماع ، فتقديره من استطاع منكم الجماع لقدرته على مؤنة وهي مؤن النكاح فليتزوج، ومن لم يستطع الجماع لعجزه عن مؤنه فعليه بالصوم ليدفع شهوته ويقطع شر منيه كما يقطعه الوجاء، وعلى هذا القول وقع الخطاب مع الشبان الذين هم مظنة شهوة النساء ولا ينفكون عنها غالباً.

والقول الثاني : أن المراد هنا بالباءة مؤن النكاح سميت باسم ما يلازمها وتقديره من استطاع منكم مؤن النكاح فليتزوج ومن لم يستطعها فليصم ليدفع شهوته .

 

[قيــ الروح ــثارة]

مع اني ما فهمت بس مو مشكلة ما بدي اعرف لأنو شكلها كبيرة الكلمة

واسفة اني سألت

ومنتظرة نقاش بكرا

​

 

[المستشـــار]

شو أسفة إنك سألتي فتون لا تجنني :19:.. مو هاد هدفنا نفيد ونستفيد


أنا بقلك معنى باءة بالعامي : معناها إذا عندو قدرة مادية بحيث أنو يصرف عليها أكلها وشربها ومسكنها و عندو قدرة جنسية يعني بيقدر يجامعها وقد المسؤولية يعني مو عقلو بيودي وبجيب يعني بيروح بيلعب بليستيشن وبيترك مصدر رزقو مثلا يعني



وبالنسبة للموضوع القادم في أول ساعات الصباح ان شاء الله سيطرح

 

[قيــ الروح ــثارة]

أوك فهمت بعتذر مرة تانية وشكرا الك كتير أخ عماد

ويلا بانتظار النقاش رقم 4 ​

 

[فيرجينيا]

ميرسى عماد لذوقك ورقتك وان شاء الله اتابع معاكم

وعجبنى جداا شرحك واسلوبك ​

 

[المستشـــار]

ميرسى عماد لذوقك ورقتك وان شاء الله اتابع معاكم​

وعجبنى جداا شرحك واسلوبك ​

رح بتنورينا والله .. وشكرا على الإطراء أختي الكريمة

 

[المستشـــار]

بسم الله الرحمن الرحيم

(يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ) .



بدنا نحكي عن الإنفتاح على الشعوب وعلى العالمين العربي والغربي هل أنت مع أخذ ثقافات معينة لا تنبع من ثقافة المجتمع .. كتير عم نشوف ثقافات سواء بالمأكل باللباس وبكل شي فشو رأيكون ورح نفصلون بعدين ان شاء الله



أسئلة للنقاش



أنت مع التعارف بين الشعوب أم مع العزلة؟يجب أن أفتح نوافذ بيتي حتى تهب عليه رياح الثقافات لكن شرط أن لا تقتلعني من جذوري
هل أنت مع أو ضد هده المقولة؟؟؟
بمعنى آخر
هل أنت مع التفتح على الثقافات العربية منها و الغربية أم أنك تفضل الانغلاق على ثقافة بلدك؟؟؟؟
وما أثار التفتح الحضاري على الدول الغربية
ما ايجابياته وما سلبياته؟؟؟

 

[قيــ الروح ــثارة]

عجبتني المقدمة كتير يلا يلا بليز بدي أعرف الآراء انا وأنت كمان بدي رأيك أخ عماد ​

 

[زهرة نيسان]

كتير حلوووووو الموضوع اخي عماد

عنجد

وانا متابعة

​

 

[المستشـــار]

أسئلة للنقاش



أنت مع التعارف بين الشعوب أم مع العزلة؟يجب أن أفتح نوافذ بيتي حتى تهب عليه رياح الثقافات لكن شرط أن لا تقتلعني من جذوري
هل أنت مع أو ضد هده المقولة؟؟؟
بمعنى آخر
هل أنت مع التفتح على الثقافات العربية منها و الغربية أم أنك تفضل الانغلاق على ثقافة بلدك؟؟؟؟

أنا برأي يجب أن أفتح باب الحوار مع جميع الشعوب فهدفي أن يأخذوا الصحيح مما لدي وأن أخذ الصحيح مما لديهم ... وهذه المقولة الواردة بالفعل أنا معها لأنو إذا قتلعتني من جذوري فما عاد لي أصل ولا ثقافة أصلا بل صرت عبئا على الثقافات الأخرى وتابعا أعمى .... وأنا متل ما ذكرت بأيد أن نأخذ ما صح فقط .. أما سياسة البنطلونات النازلة والألوان الفاضحة والكلمات الأجنبية السيئة على القمصان وسياسة تحرر المرأة بسفورها واختلاطها مع الرجل وووو ... وسياسة الأكل بالشمال والأتيكت ... أنا كل هالأمور ضدها وهي ليست بثقافتنا أبدا ولن أجعل الدعوة إلى مثل هذه الأمور أن تخرجني من ردائي وتلبسني رداء الغرب ... ​

وما أثار التفتح الحضاري على الدول الغربية
ما ايجابياته وما سلبياته؟؟؟

الأثار السلبية بعتقد إني ذكرت جزء منها والإيجابية أولا : أخذ العلم منهم لأن العلم بات لديهم الآن وتعليمه وتطويره في بلادنا ..
أخذ ثقافة الالتزام بالوقت التي هي أصلا ثقافتنا .. معرفة الصناعات وتطويرها وتنميتها ... ​

وكتير من الأمور يعني ​

وعلى فكرة هي أسئلة فتون .. بالفعل فتون أسئلة جميلة يسلمو إيديكي وبدنا انتي كمان رأيك بالموضوع ​

 

[المستشـــار]

كتير حلوووووو الموضوع اخي عماد​

عنجد ​

وانا متابعة ​

تسلمي يا رب وبتمنى تشاركينا

 

[قيــ الروح ــثارة]

عجبني رأيك بهالموضوع أخ عماد لأنو بيدل على تشبثك بمبادئك

لأنو هالموضوع كتير شفتلو آراء منون اللي قالو أنو حياة الغرب بكل شي أحسن من حياتنا

منون قالوا أبدا ما باخد منون شي

بس أنت جمعت بين الطرفين وقررت تاخد الشي الصح فقط
شي حلو

عجبني الرد

الله يوفقك على حسن اختيارك لمبادئ حياتك

ويقوي عزيمتنا وإيماننا يارب

وشكرا للأعضاء انو قاعدين عم يلعبوا وتاركين الموضيع الهادفة


ومشان رأيي
أنا عندي رفقات كتير بيقولي أنت بنت تابعة بأسلوب حياتك للغرب
مشان قضية اللبس والحكي:80:
إني بحكي بعض الكلمات الانكليزية واللي صار عندي لا شعوريا مو بإيدي لأني تعودت ع طريقة كلامي
وطريقة اللبس أنا بحب البس هيك مو لأني بحب لبس الغرب هيك لاء
بس أنا حرة هيك اللي عاجبني:80:
مو بالضرورة اذا طلع ستايلي بيشبه ستايلون بكون عم قلدون

بس أنا مع اني انفتح انفتاح كامل عليهون بموضوع العلم فقط لا غير
اما عادات وتقاليد واسلوب معيشة نيفر

لأنو هالشي الو سلبيات أكتر من ايجابيات:80:

ومبين هالشي بدون ما نحكي من خلال الفسق اللي عم يصير ببلدنا اللهم عافينا واهدينا


ميرسي

(شفت مو بإيدي كتبت كلمة ميرسي
بس ما بظن أنو غلط مو)
​

 

[ابن النيل]

انا راي في هالموضوع

انه المفرض نقلدهم في الاشياء الصحيحة اللي بتفيدنا واللي ما بيفيدنا مانقلدهم فيه ونبتعد عنه بشتى الطرق

وكمان مو نقلدهم تقليد اعمى لازم نرتقي بتفكيرنا شوي

ولا تنسو انه الغرب زمااااان كانو بيقلدو العرب في كل شئ وكل الاختراعات اللي عم يخترعوها هلئ واللي ابهرو العالم فيها اساسها من علماء المسلمين


(لما كنا احسن منهم استفادو منا وهلئ هم احسن منا المفروض نحنا نستفيد منهم) ​

 

[المستشـــار]

والله بما إنك ما بتقلديون بلبسون إنما بتلبسي لأنو هيك إنتي لبسك حلو كتير خلصنا من قصة أنو تقليد وهذا كتير حلو ... بس أنو ليش ما يكون لبسنا بمتل ثقافتنا نحن وما يقولوا علينا أنو نحن منشبه الغرب ( وهون أنا ما بقصد اللبس القديم ومدري شو لا لبس جديد بس مقبول عنا )؟؟؟

وبالنسبة للحكي بالإنجليزي برأي الشخصي بكون لثلاثة أسباب يا أما فزلكة وأنا ما بعتقد إنتي من هالنوع أبدا ..
يا أما أنو نتيجة لمتابعة الأفلام والمسلسلات الأجنبية والإنبهار بلغة الغرب الذين هم لديهم القوة وكما قال ابن خلدون في المقدمة ((المغلوب مولع أبدا بالغالب في شعاره وزيه ونحلته وسائر أحواله وعوائده، والسبب في ذلك أن النفس أبدا تعتقد الكمال فيمن غلبها . ))

والسبب التالت تعويد الإنسان حالو على هاللغة ليتعلمها ويحافظ عليها ... وأنا بأيد هالنوع ولكن مع ملاحظة أنو بيحكها مع حدا يفهم مو مع حدا ما بيفهم هاللغة بس لحتى شوف حالي عليه أو أي شي من هالقبيل


أنا هيك بشوف وهاد رأيي ويمكن خطأ ويمكن صواب

 

[المستشـــار]

(لما كنا احسن منهم استفادو منا وهلئ هم احسن منا المفروض نحنا نستفيد منهم) ​

جملة كتير حلوه

 

[قيــ الروح ــثارة]

والله بما إنك ما بتقلديون بلبسون إنما بتلبسي لأنو هيك إنتي لبسك حلو كتير خلصنا من قصة أنو تقليد وهذا كتير حلو ...

بس أنو ليش ما يكون لبسنا بمتل ثقافتنا نحن وما يقولوا علينا أنو نحن منشبه الغرب ( وهون أنا ما بقصد اللبس القديم ومدري شو لا لبس جديد بس مقبول عنا )؟؟؟

ايه فكرة جديدة ومقبولة وحلوة بما أننا مسلمات طبعا


وبالنسبة للحكي بالإنجليزي برأي الشخصي بكون لثلاثة أسباب يا أما فزلكة وأنا ما بعتقد إنتي من هالنوع أبدا ..
يا أما أنو نتيجة لمتابعة الأفلام والمسلسلات الأجنبية والإنبهار بلغة الغرب الذين هم لديهم القوة وكما قال ابن خلدون في المقدمة ((المغلوب مولع أبدا بالغالب في شعاره وزيه ونحلته وسائر أحواله وعوائده، والسبب في ذلك أن النفس أبدا تعتقد الكمال فيمن غلبها . ))

والسبب التالت تعويد الإنسان حالو على هاللغة ليتعلمها ويحافظ عليها ... وأنا بأيد هالنوع ولكن مع ملاحظة أنو بيحكها مع حدا يفهم مو مع حدا ما بيفهم هاللغة بس لحتى شوف حالي عليه أو أي شي من هالقبيل


أنا هيك بشوف وهاد رأيي ويمكن خطأ ويمكن صواب

(سبب تكلمي اللغة الانكليزية أكيد مو أنزعة :19:ليش الواحد بيتأنزع بحكيو ولا بأخلاقو :80:​

أنت جمعت بين السببين التاني والتالت
بس بشوف أفلام اجنبي كتير وسبب حكيي أني بتقنها وبحبها والأهم أنو أغلب رفقاتي بيحكو هيك ومضطرة ساير الوضع يعني فعلق الكلام بلساني:80:
وتخيل عم أكتبلك هلئ وعم حاول ما زتلي شي كلمة أجنبي:19:
بس المشكلة أني بستغرب كيف بحب وطنيتي وعروبتي وبحكي هيك ​

ومشان اني احكي هيك قدام حدا ما بيعرفو لغة أكيييد بنتبه لهالشي كتير لأنو من أداب الحديث مع الاخرين توصيل كلامي بشكل صحيح للآخر )
(وعلى فكرة ساويتو باللون الابيض لأنو مالو علاقة بنقاشنا نمبر 4):80:​

وبحكي انكليزي هون لأنو صحيح ما بعرف الكل اذا متعلم او لاء
بس يعني كلنا بمنتدى ثقافي وما بنزل موضيعي كلها انكلش بانكلش لحتى ما حدا يفهم هالكلمتين ​

ومشان رد ابن النيل عجبني كمان ردو وكتير حلو ​

فعلا ياريت نصل بعلمنا متل اللي وصلولو وكان من الأصل من عنا :80:
علماء مسلمين منهم وعرب ​

 

[الحرالباكي]

مبروك عاى التثبيت يا عماد
واكيد رح يكون النا صولات وجولات كتيرة
بمنبر البيلسان​

بشرط الاستمرار على نفس الوتيرة بعد التثبيت

وبتشكر كل اليشاركونا بآرائهم وخصوصاً فتون

بلا فرجونا همتكم واعطونا آرائكم بمنتهى الصراحة والشفافية

ولا تبخلو تشاركونا ولو بفكرة من كلمتين لعل الفائدة فيها ومن

تجاربنا وافكارنا نستفض ونفيد الجميع.......

تحت شعار الأختلاف بالرأي لا يفسد للود قضية​

​