اسألوا لولو ووفروا كشفية الطبيب

[{Dark~ Lord}]

هلأ هالبقع صغيرة وماعم تزيد ولافي حكة​

 

[sweet-lolo]

طيب ما دامت ماعم تزيد ولا في حكة
ومانا حبوب او بثور فقط تصبغ الجلد بالاحمر
بظن رح تتلاشى لحالها
والله اعلم هاي حساسية
بس غير ضارة
استنا عليها وراقب تطوراتها
وباذن الله بتروح بس انت لاتلعب فيها
​

 

[{Dark~ Lord}]

ماشي نشالله لح راقبها

ويسلمون لولو عزبتك معي ​

 

[مختار]

ازا مافي قشرة وحبوب
معناها نقص فيتامينات
لكن حنقضيا عالفيتامينات
يعطيكي العافية

 

[STELLA]

​

الله يعطيكي العافية يارب

موضوع أكتر من رائع

رح تابعو على طول

هلئ أنا كتير بسهر و السهر معروف أنو بيسود تحت العيون

بلاقي عندك شي خلطة طبيعية لحتى تخلي تحت العيون متل لون بشرة الوش

أو قريب منو ؟؟

و يعطيكي العافية يا قلبي ​

​

شكلو سؤالي ضاع بين المشاركات

يعطيكي العافية لولو​

 

[sweet-lolo]

الله يعطيكي العافية يارب

موضوع أكتر من رائع

رح تابعو على طول

هلئ أنا كتير بسهر و السهر معروف أنو بيسود تحت العيون

بلاقي عندك شي خلطة طبيعية لحتى تخلي تحت العيون متل لون بشرة الوش

أو قريب منو ؟؟

و يعطيكي العافية يا قلبي
​

لا تواخزيني حياتي ما انتبهت للسؤال

تكرم عيونك رح اعطيكي وصفة وكمان خطوات
لازم تتبعيها مشان تتخلصي من السواد
طبعا أنا فهمت ان بدك نوع من الكريم الطبيعي
بس هيك قصص غالبا ما بتعطي نتيجة مطلوبة

هلئ من اسباب السواد اولا متل مل قلتي اضرابات
مواعيد النوم فلازم تحاولي تغيري هالعادة لحتى تستفيدي
من فوائد الليل والنهار

يقول الله عز وجل في كتابه الكريم.. بسم الله الرحمن الرحيم "وَجَعَلْنَا اللَّيْلَ لِبَاسًا * وَجَعَلْنَا النَّهَارَ مَعَاشًا"،

وقوله تعالى: "وَهُوَ الَّذِي جَعَلَ لَكُمْ اللَّيْلَ لِتَسْكُنُوا فِيهِ وَالنَّهَارَ مُبْصِرًا".

يعني غالبا السواد يلي سببه السهر
ما بروح الا ازا بطلتي تسهري والضغط النفسي المتعب
والسبب التاني ممكن يكون فقر الدم بئا لازم تحللي
او نقص الاوكسجين بالدم وارتفاع ثاني اكسيد الكربون
او ممكن يكون نقص او سوء التغذية
او ممكن بسبب مستحضرات التجميل

فلازم تبتعدي عن المسببات السابقة

لازم تاكل خضراوات وفاكهة وخاصة الحمضيات ممتل البرتقال
ولحوم متل الكبدة
لحتى تعوضي سوء التغذية وترجعي الاوكسجين للدم

وصفات لازالة السواد اسفل العينين باذن الله

1- اطحني الخيار وضيفي له قطرات من الليمون
بس لاتكتري ليمون لان المنطقة تحت العين
حساسة ورقيقة وممكن تتاثر بحموضة اليمون
وحطيها على مكان البقع الداكنة

2-او ممكن ملعقة صغيرة لبن مع مطحون نصف خيارة
وحطيها على المنطقة الغامقة حول العين

3- ممكن تعملي كمادات متناوبة باردة ودافئة من مغلي البابونج
استلقي على ضهرك وحطي كمادات من مغلي البابونج
على العينين لمدة نصف ساعة
ثم اعيدي الكرة مع كمادات باردة من البابونج
وانت مستلقية ممكن تسمعي قران أو تقرئي ايات الشفاء
او استغفار والصلاة على النبي

وهالطريقة لتحركي الدورة الدموية بهاي المنطقة
يلي ارهقها نقص الاوكسجين

مع تمنياتي لك بالاستفادة العاجلة حياتي
​

 

[sweet-lolo]

الى جميع أحبائي الذين شكروني وسألوني
لكم مني كل الود والشكر على الثقة

لكني أطلب من الجميع الدعاء لي بالتوفيق
والنجاح ودوام الصحة والشفاء من جميع
الامراض العضوية والنفسية

وبتمنى للجميع الشفاء العاجل
​

 

[STELLA]

الله يعطيكي الف عافية حبيبتي

أنا ما كان قصدي بدي كريم على طول حطو

و جوابك أجاني متل ما بدي ^_^

بالنسبة للمسببات الي ذكرتيها الحمد لله مافي منها شي موجود غير السهر و طبعا التعب و الضغط النفسي

و بزيد أكتر بفترة الفحوصات

إن شاء الله بجرب الوصفات و بطمنك عن النتائج

مرة تانية شكرا


​

 

[أمورة سوريا]

أنا طولي 158
ووزني 53
وشكرا الك دكتورتنااا الحلوة
زمرة دمي ما بعرفا
الوزن اللي حابة أوصله يعني 45

​

 

[sweet-lolo]

الله يجزيكي الخير لوليتي
وبالفعل المنتدى كان لازمو هالنوع من المواضيع
سؤالي يا حلوة هو:
بعيد عنك وعن السامعين
عن علاج ضغط العصب
بعاني منو من أكتر من 5 سنين وراجعت أكتر من دكتور
وللأسف أغلب العلاج كان مسكنات أو لازم تدخل جراحي
وكمان للأسف امتد الألم من ايدي لكتفي لرقبتي (الحمد لله )
بس مو عطول ..بعد التعب بس بحس في للألم
فإذا عندك علاج طبيعي لنانتك ندوش بتكون ممنونتك
وشكر"إلك ويعطيكي ألف عافية

​

اول شي عليكي العافية يا عمري
وان شاءالله بزول الألم الى الابد
أو شي لازم تريحي حالك وما تجهدي نفسك قدر الامكان
لازم تتغذي منيح مشان تقوي الاعصاب عندك وتزيدي قوة ومناعة جسمك

والأهم من كل هالشي انك تستمري بالعلاج يعني نظام حياتي يومي كالتنفس دون ملل
يعني خذي هذا النظام الك ولجميع من في البيت ورح تشوفي الفرق ان شاءالله

كلي كل يوم بيضة مع كوب حليب وازا مابتحبي الحليب ضيفيلة رشة زنجبيل
أو مبشور زنجبيل اخضر
وممكن كمان تاكلي 7 تمرات مع كوب الحليب يعني التمر جدا مفيد وغذاء كامل
ويعالج التهاب الاعصاب ويقويها ويزيد المناعة في الجسم
البقدونس مفيد جدا أيضا لتقوية الأعصاب وزيادة المناعة في الجسم
وينقي الدم وجيد جدا للتخلص من التعب والاجهاد ممكن تاخديه مع السلطة
الجرجير مفيد جدا لحالتك ممكن تضيفيه للسلطة كمان
ما مننسى الفواكه والخضراوات يلي لازم تاكليها يوميا
والسمك جدا مفيد او الطون
مابعرف ازا انت من عشاق القهوة والشاي
بس بدك تبتعدي عنهم في فترة العلاد لبين ما يقوى العضم والعصب عندك
وتستبدليه بالمشروب السحري هااد مريح جدا لحالتك
ازهار البابونج السحرية لعلاج جميع حالات الالتهاب ومسكن للالام
ومقوي للاعصاب
+ مليسة + لافندر + بردقوش للاسترخاء وتحسين الحالة النفسية ومسكنة للالام
بتاخدي من كل صنف مايقارب ملعقة صغيرة في كوب ماء مغلي واتركيها تنتقع لمدة 10 دقائق
واشربيها بعد الفطور وكوب قبل النوم
مفيد هالشي جدا للنشاط والقوة وازالة التعب الجسدي والنفسي

هلئ اخيرا
اقرئي ايات الشفاء مع سورة الفاتحة واية الكرسي
على مقدرا من زيت الزيتون وادهني مكان الالم
باذن الله بزول الالم
طبعا مارح قلك ان لازم تكوني تؤمني بهالشي
وتحافظي على الصلوات الخمس بأوقاتها
والاهم لاتيأسي استمري ورح تشوفي النتيجة المرجوة
وتدعيلي يا حلوة وعليكي الف عافية

وألف صحة وعافية عليكي

​

 

[sweet-lolo]

أنا طولي 158
ووزني 53
وشكرا الك دكتورتنااا الحلوة
زمرة دمي ما بعرفا
الوزن اللي حابة أوصله يعني 45

​

يعني هو مافي وزن زايد أبدا عندك
ووزنك مثالي جدا
لهيك مارح أزيد عن الحكي
يلي قلتلك ياه من قبل
بس فيني اعطيي وصفة لتخفيف الوزن وهي امنة

بتضعي ملعقة صغيرة من الشمرة
في كوب ماء مغلي
وبتشربيها بعد الأكل
هاي بتسهل عمليات الاستقلاب والهضم
وبتدوب الشحوم في الجسم
وكتري من اكل البقدونس
لان كمان مفيد جدا في عملية الهضم
وخبريني بالنتيجة يا حلوة
​

 

[- ]Safee[ -]

الله يعطيكي العافية لولو..

بدي اسئلك عن شي طبيعي لتبييض الاسنان

علماً انو سبب الاصفرار الشاي والقهوة عالاغلب

وشكراً سلفاً​

 

[sweet-lolo]

الله يعافيك صافي اي تكرم
يعني هو يفضل استخدام
السواك بشكل دائم يعني مافي افضل
من مادة السواك لصحة الأسنان

في طريقة تانية مجربة بس لاتستخدمها كتير
مشان ما تشيل طبقة المينا الحامية للاسنان

بتجيب قطعة فحم وبتفرك الأسنان فيها بس لاتجور كتير عليهن

وفي طريقة تالتة
بعد ما تفرشي سنانك
جيب نص ليمونة وافركها بسنانك
بيمش الحال ان شاء الله
​

 

[sweet-lolo]

موضوع كتير نايس
لولو ~

انا قصتي قصة دكاترة سوريا احتارت معي !!!
انا عندي حساسية مفرطه جدا"
ااذا بكون نايم فجأة بصير حك !!
اذا مشيت بالشارع كتير
بصير حك
وبشكرك من كل قلبي ~
​

مية السلامة


والله لأجل الصدفة احد اقرباءنا
اجا لعنا وكان بعاني من نفس حالتك تقريبا
والدتي وصفتله وصفة كنت نسيانتا أنا
وهي حجر البيلون
انقع حجر البيلون بالماء
وبعد الحمام ادهن جسمك
وحتى الرأس بنقيع البيلون
وانتظر شي ربع أو نص ساعة لحتى ينشف
واغسله بالماء الفاتر ولا تستخدم بعده
صابون أو مادة كيماوية
​

وعليك العافية​

 

[ندوش]

تسلمي لقلبي لوليتي
ان شاء الله رح أمشي على خطة العلاج هي
والله يبعد عنك وعن احبابك المرض
شكرا" كتير لإهتمامك
​

 

[sweet-lolo]

مية السلامة حياتي وبس تتحسني وتلاقي نتيجة خبريني بالنتيجة الايجابية باذن الله

 

[احلى دنيا]

يعطيكي الف عافيه .. ما شالله عنك .. مبسوطه انو في عنا دكتورة هون
ما حبيت فوت وايدي فاضيه

انو انا عندي مشكله بحس وشي شاحب اوقات .. مع اني بنام كتير منيح
بس بيجوز من الحالة النفسيه الحمدلله
في شي حل كريم او ماسك يعطي وشي نضاره .. مع اني بحط كريمات وبستخدم المقشرر وهالقصص

 

[sweet-lolo]

يعطيكي الف عافيه .. ما شالله عنك .. مبسوطه انو في عنا دكتورة هون
ما حبيت فوت وايدي فاضيه

انو انا عندي مشكله بحس وشي شاحب اوقات .. مع اني بنام كتير منيح
بس بيجوز من الحالة النفسيه الحمدلله
في شي حل كريم او ماسك يعطي وشي نضاره .. مع اني بحط كريمات وبستخدم المقشرر وهالقصص

الله يعافيكي يا حلوة

هلئ النضارة بتجي من التغذية الداخلية
للجسم قبل التغذية الخارجية

كلي 7 تمرات مع كوب حليب على الفطور
يعني التمر شي خطيير مشان نضارة البشرة
كلي فواكه وخضراوات متل الفريز والموز
والخس والسبانخ والبازلا
وكلي أسماك او طون

ورح اقتبس الجواب يلي جاوبته لريم

​

بس اشربي ماي كتير على الريق
وكلي فواكه ولاتنهمي ولا تزعلي

ونامي منيح وفيئي بكير ونامي بكير

الخلطة السرية هي

بتجيبي وعاء كبير من ماء مغلي وبتحطي شوية بابونج
وبتبخري بشرتك بعد ما تغطي راسك مع الوعاء تحت فوطة او قطعة قماش قطنية
مشان تتفتح مسام البشرة شي ربع ساعة تقريبا

بتجيبي مصل اللبن وبتحطيه على وشك لبين ما ينشف
وبتغسليه بقطن وماء دافئ اقرب للبارد

او بتبشري الخيار وبتخلطي معه ملعقة لبن وبتحطيه على بشرتك شي ساعة
وبتمسحيه بالماء الدافئ

او ملعقة عسل مع ربع موزة مهروسة بتخلطيهم وبتحطين على بشرتك والرقبة طبعا لمدة ساعة
او لبين ما تنشف المقادير وبعدين بتمسحي الكل بمنديل مبلول

والاهم من كل هالشي هو الابتعاد عن الاكلات الحدة والبهارات والمقالي

ان شاءالله تعجبك الوصفة يا حلوة

​

​

واضافة لهالشي رح أعطيكي وصفة مشان تحسين الحالة النفسية والاسترخاء

ورقتين مليسة + نص ملعقة صغيرة لافندر + نص ملعقة صغيرة بردقوش

بتحطين بكوب ماء مغلي وبتشربيه بعد الفطور

وعليكي العافية يا ئمر



​

 

[► Mr.Rami ◄]

الله يعطيكي الف عافية يارب

دكتورة عندي مفصل إيدي أو بالأحرى المعصم وبنفس الوقت منتصف اليد من فوق عم يوجعني

 

[احلى دنيا]

والله باكل فواكه وتمر يعني اكلي منيح .. بس اكيد رح جرب يلي قلتي عليه

طيب صحيح انو الشاي الاخضر بضعف ؟