مغامرات عضو .. على جزيرة مهجورة ..!

[عشتار]

لا صديقتي ما في داعي تتقيدي بحدا

بدنا إبداعك يحلّق بحرية ..

فيك ِ تشوفي الأسئلة اللي حطتهن ملاك الروح بأول الموضوع

بانتظارك


​

 

[RaNoSh]

مغامرات الملكة كليـوباتـرا ​

أتت البطلة المقدامة كليـوباتـرا مع مغامرتها الخنفشارية​

وأترككم مع القصة ​

7​

7​

7​

7​

ركبت بغواصة .. كان عندي رحلة استكشاف بأعماق البحار​

انطلقت الغواصة فينا وكان معي مجموعة من علماء البحار ومجموعة من الغواصين الماهرين​

كانت الغواصة معدّة بأحدث الأجهزة و الأنظمة وكانت شغالّة 100%​

المهم كنا نازلين لأعماق البحار وإذ بيطلع المتور خربان وبدو تغيير زيت ​

الحمدلله كان معنا رِجَال إعداد الغواصة .. فوراً و شغلة 10 دقايق كان المتور شغال و عين الله عليه​

كملنا رحلتنا البحرية داخل أعماق البحار و كلما ننزل أكتر تصير الأعماق مظلمة أكتر​

ونشوف السمك الملوّن وأشكال غريبة عجيبة سبحان الخلّاق العظيم​

و فجأة بيطلع بوجهنا شي ما كنا حاسبين حسابه وهو القرش ​

مع أنو نحن نازلين لأعماق البحار ولازم نتوقع أي شي بس سقطت سهواً عنا هالشغلة وما خطرت عبالنا​

بلش القرش يشتغل شغله و كان الهيئة جوعان كتير ويمكن أخونا يلي صلح المتور جرح إيدو الله يهديه ​

ومدري من وين اتسربت ريحة الدماء للبحر و هالقرش شم الريحة و هجم علينا هديك الهجمة وما كان لحالو الله وكيلكن​

كان معه ابنه مدري ابنته ​

و دغري الرّجال الغواصين جهزوا معدّاتهن و هيئوا حالهن وهيئوا كل يلي معنا بالغواصة مشان يطلعوا على سطح البحر​

المهم يهربوا و يهربونا من القرش المتوحش يلي كان عم يطاردنا ​

بس للأسف خسرنا أحد من العلماء يلي كان معنا مشان هيك قدر الباقي و أنا طبعاً يهربوا لأن القرش التهى بأكل هالعالم المسكين​

والباقي نفدو بريشهن وطلعنا عسطح البحر على آخر نفس ​

نتطلع هيك نتطلع هيك ما لقينا قدامنا غير البحر ​

عاليمين بحر عاليسار بحر وين ما اتجهنا نلاقي البحر بوجهنا فقررنا أنو نسبح لحتى نلاقي يابسة تآوينا ​

و ما لازم حدا يبتعد عن حدا مشان نكون كلنا مع بعض ويلي ساعدنا عالوصول لسطح البحر إنو كانت الأمواج هادئة و الجو لطيف​

بس المفاجأة الجديدة يلي طلعت بوجهنا وعلى حين غرّة بلش يتغير الطقس وتحول من جو لطيف لجو كئيب ​

و الأمواج الهادئة بلشت ترتفع شوي شوي والناس كل واحد صار بمكان وما عاد حدا سمع حدا ​

حتى ما عاد حس على حاله هو وين​

وآخر شي أنا بتذكره انو كنت ماسكة إيد الغواص بلال ​

وبعدين فقدت الوعي ما بعرف أديش المدة كانت ​

بس لما صحيت لقيت حالي على جزيرة شبه مهجورة أي خالية من الناس ​

ولقيت قدامي أخي بلال شاعل نار وعم يتدفأ قدامها على قد ما كان في برد​

وقت شافني فقت لقيت الدمعة بعينه من الفرحة ​

سألتو وين الباقي ... قلي ما بيعرف بس هو بقي ماسك ايدي لحد ما لقى يابسة وضل يسبح و يقاوم لوصل الها و سحبني معه​

قعدنا نبكي شوي على يلي راحوا و فقدناهن ​

ولبين ما صحصحت منيح قررت انا وبلال نقوم نعمل جولة صغيرة قبل ما ينزل الليل علينا مشان نلاقي شي مكان ننام فيه​

ونحن عم نتنقل على الجزيرة وجدنا شجرة عالية و اوراقها كبيرة ولقينا فيها جوز هند ​

فقال بلال انو يتسلق الشجرة منو بيجيب أوراق و منو بيجيب جوز هند لنأكل​

بس الاوراق كانت كبيرة كتير و قاسية وما معنا شي نقطع فيه الورق ​

وبلال على الشجرة وانا عالارض عم دور على شي نقدر نقسم فيه الاوراق​

بلتفت يمين بلتفت شمال و إذ بلاقي أداة حادة ما بعرف شو هي بس المهم أداة حادة ينقطع فيها أوراق الشجرة ​

وناولته ياها لبلال و بدأ يقسم الاوراق وانا جمعها لحد ما صارو بيكفونا تقريباً​

نزل بلال وحمل هو جوز الهند وانا حملت الاوراق و وصلنا قريب الشاطئ تقريباً مشان نتونس بضو القمر الخلّاب والنار يلي كنا شاعلينها​

زبطنا الاوراق على شكل تخت وخلينا اوراق نتغطى فيهن ​

و طبعاً الاداة الحادة كانت معنا مشان اذا هجم علينا شي حيوان شرس بالليل نكون مستعدين للهجوم​

وبقينا سهرانين طول الليل مع انو كنا تعبانين بس بنفس الوقت مبسوطين انو نحن مع بعض ... ​

والحمدلله ما حدا هجم من الحيوانات علينا لأن كنا بعاد عن الغابة ​

نمنا شوي وقت بدأت الشمس تشرق وفقنا تقريباً بعد شي ساعتين على صوت حدا عم يطلب النجدة​

و إذ بتطلع الاخت رهام جاية من البحر و أول ما توصل عالشاطئ بترتمي عليه وبتفقد وعيها ​

وانا وبلال منط من أربعتنا فزعانين عليها و منسحبها لجوا حد النار وبكبس شوي على معدتها مشان تطالع الماء يلي بالعته ​

والحمدلله بتصحى ما فيها شي بس بتكون نسيانة شو صار معها ​

و آخر شي بتتذكره انو كانت الموجة فوق راسها تمام وما كان في حدا قريب عليها أبداً​

عالضهريات قمت دور على اكل وبقي بلال مع رهام مشان اذا صار معها شي على غفلة هو بيعرف شو يعمل ​

وانا فتت عالغابة وصرت غمق وغمق وغمق بعدين لقيت شجرة موز والموزات كتير عاليين فقررت اني اتسلق الشجرة وبدأت بالتسلق ​

وصلت لفوق وكنت تقريباً كاشفة جزء منيح من الغابة و أنا عم اقطف هالموز بلتفت لورايي وبلاقي المفاجأة التانية ؟!! ... ​

شخص مستلقي على شط البحر ما قدرت حدد هويته لأن كنت بعيدة كتير​

بس كانت الفرحة رح تطيرني وما هي إلا ثواني معدودة وبتهب نسمة صغيرة و بتطيرني عنجد وأقع من على الشجرة ​

بس الحمد لله بتجي سليمة وبيسقطوا الموزات عليي من دون عناء القطف​

وبحمل هالموزات وبكمل طيراني عالشاطئ لعند رفقاتي وبصل على آخر نفس وبخبرهن بيلي شفتو ​

ومنأكل دغري و رأساً منتوجه عالشجرة يلي كنت عليها مشان الأستاذ بلال يحدد موقع الرّجل الصّحيح لنعرف كيف بدنا نتجه​

وطلع المكان عى طرف الجزيرة من الغرب وما كذبنا خبر حملنا حالنا و توجّهنا لمكان الشّخص يلي وجدناه ​

وبيطلع العالم محمود فمننبسط كتير انو لسا في معنا حدا من العلماء بس كان هو بحالة مزرية و تيابه مشروطة وما كان وعيان أبداً​

بيحمله بلال بمساعدة الفريق يلي معه ( يلي هو أنا و رهام ) ​

للمكان يلي كنا متآويين فيه ومنحطه قريب من النار مشان يتدفأ ويستعيد وعيه بعدين منطعميه من الأكل يلي جبناه من الغابة ​

وهيك منقضي تاني يوم عالجزيرة المهجورة بأربع أشخاص فقط من أصل 12 ​

منسهر طول الليل عم نفكر كيف بدو يرجع كل واحد لبلده يلي اجى منه بهدف الاستكشاف ​

تالت يوم منقوم من الصبح بكير عم نستعد لتنفيذ الخطة يلي طلعت معنا بالسهرة ​

دخلنا الغابة نحن الكل وبدأنا ندور على أغصان أشجار و ورق مقوى وجذوع تفيدنا بعمل قارب بدائي ​

جمّعنا كم غرض وطلعنا عالشاطئ نزبط أمورنا ... ​

رتبنا الجذوع لتكون أرضية القارب و ربطّناهن مع بعض و اعملنا شراع من أوراق الشجر​

نزّلنا القارب الخنفشاري البدائي يلي اخترعناه عالبحر و اركبنا نحن الأربعة عليه والحمد لله كان البحر هادئ​

بدأنا نجدف بالخشبات وبعدنا مسافة منيحة عن الجزيرة لحد ما بيّن معنا طرف سفينة كبيرة ​

آم ضل محمود وبلال عم يجدفوا و أنا و رهام بدأنا نلوّح للسفينة و قرّبنا منها و الحمدلله هنن شافونا وبعتولنا قوارب المساعدة ​

وكانوا كتير أكابر معنا وعاملونا باحترام و وصّلونا لبلدنا بما انو ما كان معنا شي ​

وهون بتنتهي مغامرتي الشيقة وبقعد بحكيها لأهلي و رفقاتي ... ​

وقررت بعد ذلك إني خوض مغامرة أخرى لاستكشاف أعماق البحار لأنها كانت رحلة كتير شيّقة ​

جميع حقوق الطبع و النشر و الاقتباس و الترجمة محفوظة لرنوشة فقط ​

إن شاء الله تنال إعجابكن​

​

 

[سِدْرَة المُنتَهَى]

كسرتوا خاطري عليكم
بس كويس بالاخير لقيتوا ناس اصيلين و يفهموا

رنووووشة

 

[RaNoSh]

كسرتوا خاطري عليكم

بس كويس بالاخير لقيتوا ناس اصيلين و يفهموا ​

رنووووشة ​

ايمانو


( قيميني حياتي )​

 

[دموع الورد]

الله ستركم رنوووش

الحمدلله عالسلامة
​

 

[عشتار]

كله فداء العلم يهون

الحمد لله عالسلامة لكامل الفريق

اي شوهاد كليوبترا ..
​

 

[الأمبراطور]

اي شو هالعلماء الفهمانين هدول
ما بيعرفو انو القرش ما بتقدر تاكل الغواصة
ولا كانو راكبين بسكوتة مثلا
الله يعينا اذا كل علمائنا هيك
هه
يسلمو

 

[RaNoSh]

اي شو هالعلماء الفهمانين هدول
ما بيعرفو انو القرش ما بتقدر تاكل الغواصة
ولا كانو راكبين بسكوتة مثلا
الله يعينا اذا كل علمائنا هيك
هه
يسلمو

مين قلك انو القرش أكل الغواصة

القرش كسر الغواصة

​

 

[سِدْرَة المُنتَهَى]

صار الدور على مين
معماري تفضل عالجزيرة ​