بيلسانيات..!!

[Yara]

حبوب: لك فرحانة خير ليش وشك اصفر هيك ووين كنتي غاطة هالفترة

فرحانة: اهلين حبوب والله من الشوفات لعم نشوفا صرت تقرف تعمل شي بهالدنيا

كلو ثورات وكلو مظاهرات ومطالبات بالتنحي هون وهون وزعماء معتوهين

وبيجيك من بعدن ابناء اعته يعني لوين بدا توصل فينا المطالبة بالحرية ما بعرف

حبوب: اي روئي روئي لسا شوي صوتك بيوصل ع اخر الحارة بعدين ناقص تسبي عالعلن كمان

فرحانة: لك لانو شي بيجنن لكن ما سمعت بقرارات المجلس العسكري بمصر

حبوب: ما بعرف والله بس سمعت انو هنن ..ملتزمون بالمعاهدات.. هيك قالوا بالتلفزيون

فرحانة: طيب وانت شو فهمت من هالكلام

حبوب: فهمت انو ملتزمين بالمعاهدات بس شو هنن هالمعاهدات الله بيعلم

فرحانة: شوف لقلك من جهة السفارة الاسرائيلية فهي رح تبقى بالقاهرة يعني رح تبقى

حبوب: معقول لعما اذا صحي

فرحانة: ومو بس هيك خط الغاز كمان رح يبقى شغال

حبوب: لك هاد مو فجروه

فرحانة: عادي بيرجعوا بيوصلوه شو هالشغلة الفظيعة يعني

حبوب: طيب ومعبر رفح رح يبقى مسكر ؟؟

فرحانة: شي طبيعي ولو لك شو عم تحكي انت لك هاد اهم لاسرائيل من خط الغاز

حبوب: شووووووووو

فرحانة: لك اي متل ما عم قلك ولسا ما خفي كان اعظم يعني هي المعاهدات المعلنة وما في الخفاء اشياء لا يعلم فيها الا ربك

حبوب: قال ثورة قال يعني تونس لهلئ ما صار شي معهم وليبيا ناطرة هالمعتوه لتشوف

شو اخر تقليعاتو وجنوناتو وهي مصر كمان يلا رح ننطر ونشوف بما انو غيرو الرئيس بركي بيغير هالمعاهدات

فرحانة: ليش دخلك هنن غيرو الرئيس؟؟

حبوب:

فكرة وحوار..Gabriel

اكسسوارات وحباشات والذي منو..فرحانة وحبوب​

 

[آلبتول]

يآآآه كم فأتني الكثير
حتى رجعت للصفحة الرابعة
لم أتوقع حبوب وفرحانة لهم بغم السياسة
قرأت كل ما نثرته هنا من جدل
ضحكت وبكيت ....بكيت وضحكت
وهل لدينا غير ذالك يا عرب

:
.
يارا شكراً لخفة دمك وروحك المرحة
أمتعتنا جداً
واشكر بالنيابة عنك ذات الأفكار المتخفية
غابريل ​

 

[دموع الورد]

يعطيكم الف عافية

حبوب ... فرحانة

Gab..... يارا




​

 

[Yara]

فرحانة: شو صايرة بشعة هالايام..الناس كلها بتطلع فيك

حتى دموعك بتفضحك بدل ما تخبيك

حبوب: ليش خير ..الايام نحن منحليها ونحن منبشعا

فرحانة: والله يا حبوب ما بعرف شو قول وما بعرف شو احكي

بعرف انو الروح تعبانة والقلب عم يبكي

حبوب: ما عاش البكي يا صديقتي شو صاير فيكي

فرحانة: ضاع العمر يا حبوب راح ووقف ع بابو بس الباب كان مسكر

والعمر نطر ونطر والباب بقي مسكر

حبوب: ليش الالغاز يا فرحانة باب شو وعمر مين

فرحانة: لحظات مرت يا حبوب وكانها حلم

حبوب: رجعنا للاحلام مو قلتلك لا بئا تحلمي

فرحانة: حلمي كان هربان من وجع عم يشكي

حتى شوارع هالمدينة ما قدرت تخبيه

حبوب: هو العشق يا فرحانة ما في غيرو بيلخبط حياتنا وبيخليها تنقلب راس على عقب

بس صعب نعيش بدونو منصير متل الشوارع الي ما الها اسامي..بعمرك شفتي شارع بلا اسم

فرحانة: لك هالشوارع لعم تحكي عنها عبرناها سوا هو وانا حتى نسمة الهوا شميناها سوا

وحاراتك يا شام زرناها سوا..معقول كلو كان حلم..كنت عم بحلمك يا حب

حبوب: طيب حكالك عالشمس والليل

فرحانة: حكالي عن الطفولة وشفت بعيونو فرحة مقتولة

بس قلي ..قلي بحبك يا طفلة خجولة

حبوب: بكرا بتتلاقوا

فرحانة: ااااااايه شو بخاف من بكرة..ما نبقى ناطرين
​

 

[دموع الورد]

ااااااااااااه من بكرا والمستخبي
​

 

[mahmoud salih]

قصة قصيرة
نعيان وواعي
نعيان: يالطيف يالطيف لك شفت شو عم يصير بهالدنية
واعي : شو عم يصير يعني ؟؟؟!!
نعيان : زلزال باليابان و سونامي و فوق منها انفجار و اشعاعات نووونووية !
واعي : شوهاد
نعيان : نوونوية
واعي: ايه بتقصد نووية !
نعيان: المهم.. و مشعللة بليبيا و بالبحرين و مصر و تونس وهون وهون .... حوالينا ولا علينا إنشا الله .
واعي : يا لطيف الله يستر ويرفع البلاء يارب
نعيان: يعني ليش كل هالمصايب عم تصير برأيك !
واعي: من الفساد !
نعيان : الفساد ....! ايه بسمعة كتير هي الكلمة ... يعني الرشوة ماهيك
واعي : لاء
نعيان: طيب السرقة
واعي: لاء
نعيان : ايه عرفتها... استغلال المنصب للمنفعة الشخصية .
واعي : الفساد يا صاحبي هو أكتر من كل يلي حكيتهم مجتمعين !
نعيان : انت كل مرة بتفوتني بالحيط و ما بفهم عليك شو عم تحكي
واعي : حبيبي انت ما حابب تفهم !
نعيان : طيب فهمني ياها وحدة وحدة
واعي: لو عندك ضيعة بتبذر شوالين قمح بالسنة فبكون المحصول تبعهم ...
نعيان: أنا أنا بعرف.... إذا بكل حبة سبع سنابل وبكل سنبلة مائة حبة بكون ...... 140 شوال
واعي : قصدك 1400 ... المهم ... لو العمال أتلفو 2 % بسب الاهمال شو منقول ؟
نعيان: فساد ... هلاْ عرفت شو يعني فساد..
واعي : لا مو فساد هي نسبة هدر بسب أخطاء بشرية ومن 1-2 % هي حدود مقبولة ما أثرت على مسيرة نماء أكبر الاقتصاديات في العالم.
تعيان: فهمت عليك ... يعني بدك تفهمني أنو إذا المختار اقتطع لنفسو ولجماعتو 30% بيكون فساد
واعي : لك شفت شلون بتخطف الكباية من راس الماعون
نعيان : طيب خلص هات لنشوف و على مهلك!
واعي: شغلت 30 % للمختار وجماعتو اسمها اقطاع وعاشها جدي وجدك وجدو لجدي وجدك ورغم ذلك, الفساد اليوم أكبر بكتير .
نعيان: شيه شيه والله حيرتني وبعدين
واعي : لما القرية بتجوع و الناس بتمشي دايخة مو من السكر ,بس من تفاقم مشاكلها وقلة حيلتها لأنو ابن المختار سرق شوالين القمح قبل زرعهم . وقتها فيك تقول هاد هو الفساد بعينو.
يقول الله تعالى في أوائل سورة البقرة
وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ * أَلا إِنَّهُمْ هُمُ الْمُفْسِدُونَ وَلَـكِن لاَّ يَشْعُرُونَ .​

 

[عكــ البيلسان ــيد]

اي ومو ابن المختار ما عندو تراب ليزرع
جايي يسرق تراب الارض كمان فوق شوالين القمح
يمكن ما شبعو الفساد ئام أكل الفساد وعينو كمان
​

 

[دموع الورد]

اي هاد هو الفساد بعينو بس يمهل ولا يهمل

وجايييييييييييك الدور يا حبيب


​

 

[آلبتول]

بالفعل نعيان وواعي هي الشريحة الأكبر التي لا تتكلم لا ترى لا تسمع لكن تصمت بحكمة

جميل جدا جداً مشاركتك محمود بيك

والأجمل انك لخصتها بآية كريمه من القرآن الكريم

بقعة /
أعتقد لو تتشاركان أنت ويارا سيكون لنا ثنائي رائع ^^​

​

 

[Yara]

فرحانة: كيفك حبوب

حبوب: لك فرحانة هاد انتي وين كنتي غاطة وين هالغيبة

فرحانة: اي هاد انا بشحماتي ولحماتي سالناك كيفك

حبوب: انا منيح منيح انتي شلونك وليش هالطولة

فرحانة: ما كان عندي حكي ..شو اجي اعمل ورجيك طولي مثلا

حبوب: معقول كل هالحكي بهالدنيا وهالاخبار وخلص الكلام عندك

فرحانة: اي لانو لعم نشوفو خلا افواهنا تتسكر او بالاحرى قفلناها غصب عنا

حبوب: بيعين الله.. زعلانة مو

فرحانة: مو بس زعلانة انا محروء قلبي عالياسمين محروء قلبي ع بلادي

عالاموي..درعا اللاذقية وبحرها الحزين

حبوب: بتبقى سوريا ..العز والمجد

فرحانة: يا ويلو من الله لبيعمل فتنة وبدم الشعب بيتسلى

حبوب: الا ما نوصل ليوم يكون الكل فيه مرتاح ودم الشهداء ما رح يروح هدر

لانو انولدوا من جديد بقلوبنا والكل عم يشتغل بالاصلاحات وما حدا ساكت

فرحانة: حبوب..في حضرة الوطن كلنا واحد في حضرة الوطن كلنا سوريا

في حضرة الوطن نحن بخير ومن دون الوطن رح نصحى كل يوم يتيمين

بلا امل


​

 

[عكــ البيلسان ــيد]

هاد اذا ئدرنا نصحى وئتها
الله يئدم اللي فيه الخير لها الوطن
يافرحانة......
ان شاء الله بيرجع الوطن
احسن من وئت مضى عليه الزمن
​

 

[آلبتول]

ضجرتُ الروحِ ولم تعّد لها من متسعٍ غير أن تبحثُ عن عطرٍ تستنشقه

كم كانت بيلسانياتكِ وقعةٍ تخففُ من دمويةِ أنفاسنا ..!

كفاكِ غياب وعـــــــودي إلينا ....لقد استوحشنا غروبكِ

 

[The Hero]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
​

 

[Yara]

فرحانة: كيف الشام يا حبوب

حبوب: ااااااايه يا فرحانة زمان عنك وين هالغيبة؟؟

فرحانة: ما في نفس لشي يا حبوب قلبي عندكم وروحي معكم

ما قلتلي كيف الشام؟؟

حبوب: زعلانة وياسمينها عم يبكي

فرحانة: ياسمينها الي كان يسلم عالغريب قبل القريب عم يبكي

شو صار فيكي سوريا ..ليش حزينة هيك لا تزعليني رجعي ابتسمي

حبوب: سوريا صعب ترجع تعيش يا فرحانة ودم الثورة مجمد جواتا

فرحانة: وحق بلادي بالحياة مين بيعطيها ياه ..الظلم بيعمل من المظلوم

بطل وما اكثرهم ابطالك سوريا ..اشتقنا لعصافيرك تزقزق عن فجر جديد

بس فجر بيحمل فيه كمشة ياسمين وحرية

حبوب: حرية؟؟ لك تفي من تمك قال حرية قال لك وجعنا راسنا من هالكلمة وصار معنا مرض القلب

ما عاد بدنا اصلاح وخلينا بحالة انبطاح ولا بئا بدنا سلمية ولا قومية ولا بلطجية

فرحانة: معناها كاسك يا وطن وعليك السلام ورحمة الله وبركاته

بس رح ابقى حبك سوريا ورح ابقى حبك يا شام..شبيحة بحبك عميلة بحبك

مندسة بحبك وثورية بحبك معارضة بحبك وموالية بحبك بالاتنين بحبك وبالجمعة اكتر بحبك

وان ما كان بكرا احلى لبعدو اكيد يا شام

حبوب: قولك بيكون شعبا متراضي؟؟

فرحانة: اكيد ولو جابولو خمسمية قاضي ومن كل الاراضي

حبوب: وبركي ولا قاضي كان منون راضي

لانو الناس لما بتتسمى خلت الدولة تجتمع بابوها وأما عمواطن بيحكي عالفاضي

فرحانة: هي الدولة انتقمت منو شو نسيت انا بتخاف من الكلمة وشعورا لا ارادي

حبوب: اااااااايه شييييييييييييييييييييييييل
​

 

[The Hero]

إن الخيال هو الحلم بشيء أفضل من الواقع.. و الذين لا يفكرون في غير واقعهم لا يرون شيئًا غير أقدامهم.. و عادة ما يسقطون

 

[إلهام]

ياما حكيت بكرا احلى
ورح يتغير شي
تمنيت ماتغير شي ورضيت بلي كان
لو علمت بالغيب لرضيتم بالواقع
ودي يارا لو تعلمين كم من الوقت احتجت لاسترد انفاسي هنا
لعلو خير
​

 

[عكــ البيلسان ــيد]

بكرا طالع فجرك ياشام أحلى وأجمل من مبارح اللي كان
​

 

[Yara]

فرحانة: تبقى ميل تبقى سآل متل الاول ضل سآل

حبوب: اي شو هالمزاج العالي بعد هالغيبة ..كيفك انتِ ملا انتِ

فرحانة: ثمة شوق يعتريني

حبوب : شو هاد

فرحانة: لك شبك بتضلك مصدوم شو غريبة انو الواحد يشتاق

ااااايه يا حبوب ..حبو عم يقطف زهرات عمري الواحدة تلو الاخرى

حبوب: لا وفصيحة كمان اي ان شاء الله ما بيخليلك ولا زهرة بالحديقة

فرحانة: من قهرك عم تحكي هيك بعرف بعرف لانو ما حدا ملتكش فيك

حبوب: هه ماشي ما قلتيلي كيفك ؟؟

فرحانة: ييييي علينا لك كل ما تسالني كيفك بتذكر اني مو منيحة فيك ما تسالني هالسؤال

حبوب: معناها البلد بخير البلد بخير

فرحانة: وشو دخل البلد ان كنت بخير او لاء

حبوب: اشتركي معنا بركي بتربحي ..وطناً سعيداً..

فرحانة: بعروبتي بعروبتي ضحكتني لك شفت شلون غيرتلي مودي ورح غير النغمة

الفيروزية لشحادين يا بلدنا

حبوب: يا ستي شايفلك انو الانسان بالنهاية هو اكبر قضية يا بتكسب يا بتخسر

فرحانة: اي معك حق لانو عايشين والعياذ بالله بدول عم تتسول الكرامة الوطنية المؤجلة الى حين

قولك الى متى؟؟؟

حبوب: الى ما بعد بعد حيفا

فرحانة:

حبوب: ولسا بيغنولك الحلم العربي..لك هاد الظلام العربي قولتك بيعطوا فلسطين الحق بالانضمام للسموم المتحدة

فرحانة: يا حبوب فلسطين مشروع مؤجل الى حين

حبوب: كمان!!! والى متى يعني

فرحانة: الى ان ينتهي هذا الزمن البذيء ربما.. اقول ربما هااااااا

ويا طير يا طاير على طراف الدني لو فيك تحكي للحبايب شو بني يا طير يا طير
حبوب:
​

 

[ربيــــــع]

من يوم لي تكون ياوطني الموج....كنا
سوا
ليوم لي بيعتق
ياوطني الغيم....رح نبقى سوا
تاجك من القمح...ومملكتك السلام
شعبك بيحبك...لتبرد الشمس ...وتوقف
الأيام

تلك كانت دندنة وطن ...لفيروز
.
.
.
و للعشق مع فيروز دندنات و دندنات ...

حماك الله يا وطني ...
و سلمك أناملك السحرية يارا

 

[عكــ البيلسان ــيد]

لك حبوب , دخلك عم اتشفلي فرحانة بها الايام ؟
صرلها زمان غاطة ليكونوا اعتقلوها ومالك مخبرني ها ؟!

حبوب : والله ما بعرف ياعكيد هي اخر مرة كانت عم اتئول اسقاط النظام بعدين ما عاد شفتها
عكيد: خير خير ان شا الله , صحي ياحبوب ع سيرة النظام واسقاطو

مزبوط ,كلنا بدنا النظام يسقط !!
إي نعم بدنا .. "إسقاط النظام"
مع إني صرت اكره هالكلمتين
ولما بسمعهم بشمئز وبترتعد ئامتي

بكرههم
يمكن لأنو صارت فاتورة هالكلمتين كبيرة
يمكن لأنو كررناهم كتير ولعت نفسنا منهم
يمكن لأنو صار هالشعار متل الحصان ..
كل ما واحد حابب يركب .. بينط عليهم ..
وبيتسبب على كيفو, حسب مآربو يلي بمخو.

لهيك غيرت التسمية لحالي وبالي بدون تصويت وبدون ئيموقراطية

المهم , انا بصراحة جوي عكر هالكم يوم من ضغط عملية "الهر"
وحابب اشعل الضو على كم نقطة

مع طول امد الثورة .. وإبداع شعبنا الفالح
طلع معنا اساليب كتير " لهر الكيان " يعني بتناسب الجميع
الكبير والصغير وحتى المأمّط بالسرير

فيك تهر هالكيان بكتير قصص
_( بــ زء ), النظام بيكون راكد .. بيجي زيكو البربلو .. بيأدحو زء .. بيتفركش وبيروح طب على خلئتو. "هر"

_( بــ فضيحة أخبارية ), بيكون النظام نايم بيفيق بيفتح علاخبار, من عزم الفضيحة بتجيه جلطة ويسلت من عالكنباية .. "هر"

_( بــ فخ ), بيكون النظام عم يتسيرن بالغابة .. وفجأة بيكون في حفرة مموهة وبس يدعس فوئها ... بيروح دبلّكة .. "هر"

_( بــ بئشرة موزة ) بتلطيلو عالكورنيش وهو عم يعمل سبورت كولا الصبح وبتلحشلو ياها بين رجليه بيكون خالص .. "هر" :d

كيف ما بدك .. وشلون ما بتلاقي حالك مفتّح .. المهم تشتغل على هرّو .. لأنو حاجتو طلعت ريحتو
بس بدنا الكل .. نحنا بحاجة الكل يآجر معنا .. لأنو في ناشطين ختيرو وهرو سنانن وركبو بدلات
وصار لازم ينزلو اللعيبة الاحتياط
اي نعم بيكفي تحماية ... نزلو ابي نزلو

الفرق بين أن تكون سوريا فاعلاً في الثورة وهر النظام وان لا تكون

كالفرق تماماً بين أن تكون حيّا .. أو ميتا
في نظري ... الناشطين هم أحياء
والمتفرجين أموات .. بل جيفً تنتة ليس لنا منهم إلا الرائحة الكريهة والمنظر المزعج.

طولنا الحديس عليك ياحبوب وع السامعين ئصدي القارئين ,
وإذا ما بدكم تقرأوه كلو قرأو بس النص التحتاني

جمعة مباركة .. أودعناكم ​